घरपरिवार सहित बलवा नगरपालिकाका मेयर पोखरा भ्रमणमा, युवाहरुले गरे अफिसमा तालाबन्दी

न्यूज ब्यूरो, जनकपुरधाम । प्रदेश नम्बर २ को महोत्तरी जिल्लास्थित रहेको बलवा नगरपालिकाको कार्यालयमा तालाबन्दी गरिएको छ ।

बलवा नगरपालिकाका जनप्रतिनीधिहरु परिवार सहित लामो भ्रमणमा गएको बेला स्थानीय युवाहरुले नगरपालिकाको कार्यालयमा तालाबन्दी गरेको छ । स्थानीय युवाहरुले बुधबार दिउँसो कार्यालयमा तालाबन्दी गरेको हो ।

विगत १० दिनदेखि बिना सूचनाकै नगरपालिकाका नगर प्रमुख विनोद कुमार यादव सहित वडाध्यक्षहरु, वडासदस्यहरु पोखरा भ्रमणमा गएका छन् । जनप्रतिनीधिहरुले आ आफ्नो परिवारका सदस्यहरुलाई समेत लिएर सरकारी खर्चमा भ्रमणमा लगेको भन्दै युवाहरुले विरोध जनाएका छन् ।

जनप्रतिनीधिका साथै कार्यालय सहयोगी बाहेक अन्य सबै कर्मचारीहरु समेत भ्रमणमा गएका छन् । कर्मचारीहरु समेत भ्रमणमा गएपछि सेवाको लागि आउने सेवाग्राहीहरु त्यतिकै घर फर्कन बाध्य भएका छन् ।

ईन्जिनीयर बसन्तराज साहको अगुवाई गएको युवाहरुको टोलीले मेयर यादव विरुद्ध नारावाजी गर्दै कार्यालयमा तालाबन्दी गरेको हो । उनीहरुले जनप्रतिनीधिहरु भ्रमणबाट आएपछि भ्रमणको सबै हरहिसाब लिने बताए ।