न्यूज ब्यूरोका पत्रकार यादवमाथि आक्रमण प्रयास गर्नेमाथि कारवाही गर्नुः राष्ट्रिय एकता अभियान

न्यूज ब्यूरो, जनकपुरधाम । जनकपुरबाट सँचालनमा रहेको न्यूज ब्यूरो अनलाईनका पत्रकार (धनुषा सँवाददाता) सुरेन्द्र यादवमाथि भएको आक्रमण प्रयासलाई निन्दा गरिएको छ ।

राष्ट्रिय एकता अभियानले सोमबार एक प्रेस विज्ञप्ति जारी गर्दै पत्रकार यादवमाथि भएको आक्रमण प्रयासप्रति आपत्ति जनाउँदै आक्रमण प्रयास गर्नेहरु उपर कारवाहीको माग गरेको छ ।

अभियानका धनुषा जिल्ला सँयोजक मनिष पुर्वेद्धारा जारी गरिएको प्रेस विज्ञप्तिमा गत साउन ३० गते न्यूज ब्यूरोमा प्रकाशित समाचार हनुमानचोक र इस्लामको मुद्दालाई लिएर केही व्यक्तिहरु समाचार लेखेको भन्दै आक्रमण गर्नु बलजबरदस्ती रहेको ठहर गर्दै कारवाहीको माग गरिएको छ ।

साउन ३० गते विहान समाचार प्रकाशित भएपछि इस्लामचोक लेख्ने व्यक्तिहरुले अपरान्ह न्यूज ब्यूरोका पत्रकार सुरेन्द्र यादवलाई फोन गरी जनकपुरको भानुचोकमा भेटन भन्दै आक्रमण प्रयास गरेका थिए ।

जनकपुरधाम उपमहानगरपालिका वडा नम्बर ७ बसहिया रोडस्थित रहेको हनुमानचोकलाई स्थानीय इस्लाम साफीका छोराहरुले आफ्नो घरमा इस्लाम मार्केट सहित इस्लाम चोक समेत लेखेपछि विवादित बनेको थियो । सोही समाचार लेख्दा उनका छोरा यमराज साफीले धाकधम्की सहित आक्रमण प्रयास गरेका थिए ।

पत्रकार सुरेन्द्र यादव विगत ३ बर्षदेखि निरन्तर न्यूज ब्यूरोमा प्याट्रोलिँग् टिमलाई कमाण्ड गरिरहेका छन् । उनले धनुषा जिल्लाको विभिन्न कुनाकाप्चाको घटनाप्रति घटनामाथि नजर राख्दै आएका छन् ।