अफगानिस्ताबाट नेपाली नागरिकलाई चाँडै फिर्ता ल्याउः अध्यक्ष बस्नेत

न्यूज ब्यूरो, जनकपुरधाम । नेपाली काँग्रेस पार्टीको भातृ सँगठन तरुण दल नेपालका केन्द्रीय अध्यक्ष जीत जँग बस्नेतले अफगानिस्तानबाट नेपाली नागरिकलाई सुरक्षित ल्याउन माग गरेका छन् ।

अफगानिस्तानको विद्रोही संगठन तालिबानले अफगानिस्तानमा राज्यसत्ता कब्जा गर्ने सम्भावना बढे संगै त्यहाँ विभिन्न काम, पेशा र व्यवसायका कारण रहेका नेपाली नागरिकहरुको सुरक्षाको जोखिम बढेको भन्दै सकुसल फिर्ता गराउन माग गरेका छन् ।

“यस्तो अवस्थामा द्वन्दरत मुलुक अफगानिस्तानबाट आफ्ना नागरिकहरुलाई तत्काल उक्त मुलुक छाड्न र विपत्तिमा परेका नागरिकहरुलाई सरकार आफैले स्वदेश ल्याउन आवश्यक व्यवस्था गर्न एवं उनीहरुको जीवन रक्षा गर्नको निम्ति संवेदनशील भईदिन पनि नेपाल तरुण दल केन्द्रिय समिति नेपाल सरकार संग हार्दिक आग्रह गर्दछ ।”– जारी गरिएको विज्ञप्तिमा उल्लेख छ ।

अफगानिस्तानको विद्रोही संगठन तालिबानले विदेशी नागरिकहरुलाई अफगानिस्तान छाड्न चाहेमा समय दिएकोले पनि अफगानिस्तानमा ठुलो संख्यामा रहेको नेपाली नागरिकको सुरक्षित घर फिर्ती र त्यहाँ रहेका आफ्ना नागरिकको जीवन रक्षाको सुनिश्चितताको लागि नेपाल सरकारले तत्काल विशेष पहल गर्न नेपाल तरुण दल केन्द्रिय समिति यसै विज्ञप्ती मार्फत सरकारको ध्यानाकर्षण गराएको हो ।