कटारी-मिर्चैया-चोहर्वा सडकखण्डमा ट्रिपरबाट दुर्घटना हुने सम्भावना बढ्यो

बिनय यादव, सिरहा, २९ फागुन । उदयपुरको कटारीदेखि सिरहाको मिर्चैया-चोहर्वा सडकखण्डमा पछिल्लो समय ट्रिपरबाट सडक दुर्घटना हुनसक्ने सम्भावना बढेको छ ।

बढी भत्ता पाउने चक्करमा पछिल्लो समय ट्रिपर चालकहरुले अत्यधिक गतिमा गाडी कुदाउँदा सडक दुर्घटनाको सम्भावना बढ्दै गएको हो । अत्यधिक गतिका कारण सडक दुर्घटनाको सम्भावना बढेसंगै सर्वसाधारण एवं अन्य सवारीसाधनलाई समेत आवतजावतमा असहज भएको जनगुनासो बढेको छ ।

ट्रिपर चालकहरुलाई मालिकले समयानुसारको मासिक तलब नदिने र टिपपिच्छे प्रति टिप भत्ता दिने गर्छन् । जस अनुसार दिनमा जति ट्रिपर ओसारे त्यति नै फाइदा हुने मनसायले ट्रिपर चालकले अत्यधिक गतिमा गाडी कुदाउने गरेका छन् । जसका कारण द्रुत गतिमा ती ट्रिपरचालकहरुले हुइकाउने ट्रिपरले सडक दुर्घटना हुने सम्भावना बढाएको छ ।

द्रुत गतिमा ट्रिपर कुदाउँदा सडक दुर्घटना भएर मानवीय क्षति बढेपछि दुर्घटना नियन्त्रण गर्न अन्य-अन्य ठाउँका ट्राफिक प्रहरीले टाईम कार्ड लागू गरिरहेपनि यस क्षेत्रका ट्राफिक प्रहरीले भने हालसम्म कुनै ठोस कदम चाल्न सकेका छैनन् ।

बाटोमा हिड्ने बटुवा, साईकल चालक, मोटरसाईकल चालक लगायत साना सवारीसाधनलाई गन्तव्यमा पुग्न समेत समस्या भएको छ । अन्य ठाउँमा टाईम कार्डको लागु भएसंगै सडक यात्रा सहज भएको देखिएको छ ।