शहिदगरको यदुकूहामा सुविधासम्पन्न मदरसा सँचालन, ६ कक्षा पुगेमा पढन सउदी अरेबिया पठाइने

न्यूज ब्यूरो, १७ साउन । धनुषाको शहिदनगर नगरपालिकाको वडा नं. ३ यदुकूहा स्थित सुविधा सम्पन्न मदरसा सँचालनमा आएको छ ।

इस्लाम धर्मावलम्बीहरुको बालिकाहरुलाई विभिन्न भाषामा पठनपाठनको लागि सुविधा सम्पन्न मदरसाको एक कार्यक्रमबीच उदघाटन गरिएको हो ।

शहिदनगर नगरपालिकाका नगर प्रमुख (मेयर) उदय कुमार बरबरिया (यादव) को प्रमुख आतिथ्यमा आईतबार यदुकुहाको चाँदनीचोकस्थित मदर्सा जमिला अल हरसी नामक मदर्साको उदघाटन गरिएको हो ।

मदरसाका सँचालक मो. अलादिन मन्सुरीको अध्यक्षता तथा मेयर बरबरियाको प्रमुख आतिथ्यमा सो मदरसाको विधिवत उदघाटन गरिएको हो ।

नेपाली काँग्रेसका पूर्व साँसद शिवधारी यादवको विशिष्ट आतिथ्य तथा वडा नम्बर ३ का वडाध्यक्ष नागेन्द्र प्रसाद मण्डलको आतिथ्यमा आईतबार मेयर बरबरियाले मदरसाको उदघाटन गरेका हुन् ।

सो मदरसामा गर्लस होस्टल (छात्रावास) समेत सँचालन हुनेछ भने मदरसामा सिलाई कटाई तालिम सहित अन्य विभिन्न तालिमहरु पनि बालिकाहरुलाई प्रदान गरिने सँचालक मन्सुरीले बताए ।

उनका अनुसार, हिन्दी, अरबी भाषा सहित विभिन्न विषयहरुको पनि पठनपाठन गराइनेछ । अँग्रेजी, नेपाली, गणित लगायतका विषयहरु पठनपाठन हुनेछ भने मदरसाभित्रै कपडा धुने, खाने, बस्ने लगायतका सबै सुविधाहरु प्रदान गरिनेछ ।

सो मदरसामा पठनपाठनको क्रममा कक्षा ६ मा गएपछि बालिकाहरुलाई थप पठनपाठनको लागि सउदी रियादस्थित मदरसामा पढनको लागि पठाउने व्यवस्था समेत गरिएको सँचालक मन्सुरीले बताए । त्यसको लागि यही मदरसाले सबै पहल गर्ने जानकारी दिइएको छ ।

सो क्रममा बोल्दै नगर प्रमुख बरबरियाले विभिन्न धर्मको धार्मिक धरोहरको शहिदनगर नगरपालिकामा शिक्षा क्षेत्रमा अगाडी बढनको लागि बालबालिकाहरुको लागि एक पाइला चालिएको बताए । उनले इस्लाम धर्मावलम्बीका बालबालिकाहरुले मदरसाबाट लाभ उठाउने विश्वास राखे ।

कार्यक्रममा नेपाली काँग्रेसका पूर्व साँसद शिवधारी यादव, वडाध्यक्ष नागेन्द्र मण्डल सहित अन्य अतिथिहरुले आ-आफ्नो धारणा राखेका थिए ।