सिरहाः छोरीलाई हत्या गरेको भन्दै प्रहरी कार्यालय अगाडी लास राखेर प्रदर्शन

न्यूज ब्यूरो, १३ साउन । प्रदेश नम्बर २ को सिरहा जिल्लास्थित एक महिलाको हत्या गरिएको भन्दै परिवारजनहरुले प्रहरी अगाडी प्रदर्शन गरेको छ ।

सिरहा जिल्लाको धनगढीमाई नगरपालिका वडा नम्बर ६ सिमरा बस्ने सुनिल महतोकी श्रीमति अन्दाजी बर्ष २९ की ज्ञान कुमारी महतो आफ्नै घरमा झुण्डिएको अवस्थामा फेला परेकी थिइन् ।

गत सोमबार राती करिब १२ बजेको समयमा आफ्नै घरमा झुण्डिएको अवस्थामा मृत फेला परेकी महतोलाई मारेर झुण्डयाएको आरोप लगाउँदै प्रहरीले मुद्दा दर्ता नगरेपछि प्रहरी विरुद्ध नारावाजी गरिएको हो ।

इलाका प्रहरी कार्यालय लहानको अगाडी परिवारजनहरुले मृतक ज्ञानकुमारीको लास राखेर प्रदर्शन गरिरहेका छन् । उनीहरुले ससुरा पक्षले हत्या गरेको भन्दै मुद्दा दर्ता गर्न दबाब दिएका छन् ।

तर, प्रहरीले भने समान्य घटना रहेको र आत्महत्या रहेको भन्दै मुद्दा दर्ता नगरेपछि माईती पक्षले प्रदर्शन गरेका छन् । माईती पक्षले प्रहरीलाई जाहेरी दिँदा फाईल फालेको भन्दै प्रदर्शन गरेको हो ।

उनीहरुका अनुसार, ज्ञानकुमारीकी देवर अनिल महतो अहिले फरार भएका छन् । श्रीमान सुनिल महतो फरक क्षमताका व्यक्ति भएको भन्दै ससुरा र देवर मिलेर हत्या गरेको आरोप लगाएका छन् ।

लहान नगरपालिका वडा नं. १८ भदिया गाउँ माईती रहेको ज्ञानकुमारीको लास प्रहरी चौकी अगाडी एम्बुलेसन्मा राखेर प्रदर्शन गरिरहेको छ । प्रहरीले भने यस सन्दर्भमा कुनै प्रतिक्रिया दिन मानेका छैनन् ।