जनकपुरः देउवालाई प्रधानमन्त्री बनाउने परमादेशको विरोध गर्दै ओली समर्थकहरु टायर बाले

न्यूज ब्यूरो, जनकपुर । सोमबार सर्वोच्च अदालतले विघटन गरिएको सँसदलाई पुनःस्थापनाको आदेश दिएपछि कामचलाउ प्रधानमन्त्री केपी शर्मा ओलीका समर्थकहरुले जनकपुरमा टायर बालेका छन् ।

सर्वोच्च अदालतले संसद पुनःस्थापनासँगै कांग्रेस सभापति शेरबहादुर देउवालाई प्रधानमन्त्रीमा नियुक्त गर्न दिएको आदेशविरुद्ध ओली निकट युवा तथा विद्यार्थी सँगठनले जनकपुरको विभिन्न चोकमा टायर बालेका छन् ।

जनकपुरको पिडारीचोक, रामानन्दचोकस्थित यूवा संघका कार्यकर्ताले टायर बालेर प्रदर्शन गरिरहेका छन् । उनीहरु प्रधानमन्त्री केपी शर्मा ओलीको पक्षमा र सर्वोच्च अदालतको विरुद्धमा नारा लगाउँदै टायर बालेर प्रदर्शन गरेका हुन् ।

केही बेर अघि मात्र ओलीको समर्थन जनाउँदै मोटरसाईकल रयाली निकालेका उनका समर्थकहरुले संसद पुनःस्थापनाको समाचार विभिन्न सँचारमाध्यममा आएपछि अदालतको विरोधमा उत्रेका छन् ।

देशैभरिबाट विभिन्न ठाउँमा अदालतको फैसलालाई स्वागत पनि गरिएको छ भने ओली समर्थकहरुले विरोध पनि जनाएका छन् ।