पूर्व गाविस प्रधान महतो रहेनन्, मेयर मण्डलद्धारा दुःख व्यक्त

न्युज ब्युरो ,जनकपुरधाम । धनुषाको धनुषाधाम नगरपालिका वडा नम्बर ५ बस्ने पूर्व उमाप्रेमपुर गाविसका प्रधानपँच (गाविस अध्यक्ष) गंगाई महतोको मृत्यू भएको छ ।

उनी नेपाली काङ्ग्रेस पार्टीबाट २०५४ सालमा प्रधानपंचमा निर्वाचित भएका थिए । स्थानीयको मनजितन सफल रहेका नेताको रुपमा परिचित महतोको मृत्यूपछि धनुषाधाम नगरपालिकामा काङ्ग्रेसको एक पिल्लर ढलेको बताइएको छ ।

धनुषाधाम नगरपालिकामा सो क्षेत्रको लागि चिरपरिचीत पूर्व प्रधानपँचको रुपमा रहेका महतोको असमायिक निधनप्रति धनुषाधाम नगरपालिकाका मेयर एवम् नेपाली काँग्रेसका नेता बालेश्वर मण्डलले दुःख प्रकट गरेका छन् ।

महतोको सोमबार नै हिन्दु परम्परा अनुसार दाह संस्कार गरिएको हो । नेपाली काङ्ग्रेस पार्टीको झण्डा ओढाई सम्मान सहित दाह संस्कार गरिएको वडा अध्यक्ष इन्द्रकुमार महतोले बताए ।

कुर्शीमा बसिरहेको बेला बेहोस भएर ढलेपछि उनको मृत्यू भएको बताइएको छ । सो संस्कारमा स्थानीय लगायत काङ्ग्रेसका नेताहरुको उपस्थिति रहेका थिए।