प्रदेश २ः दुई मेयरको पद पुनर्वहाली, प्रभु साह भन्छन्– 'प्रचण्डको मुखमा कलँकको टिका'

न्यूज ब्यूरो, रौतहट । निर्वाचन आयोगले केही दिन अघि १४ जना जनप्रतिनीधिहरुको पद रिक्त गरेपछि सर्वोच्च अदालतले सो निर्णय कार्यन्वय नगर्न अन्तरिम आदेश दिएको छ ।

सर्वोच्च अदालतले रौतहटको मौलापुर नगरपालिकाकी मेयर रिनाकुमारी साह र कटहरिया नगरपालिकाका मेयर सियाराम कुशवाहलाई पदमुक्त गर्ने निर्वाचन आयोगको निर्णय तत्काल कार्यन्वयन नगर्न अन्तरिम आदेश दिएको छ ।

न्यायाधीश कुमार चुँडालको एकल इजलासले मंगलबार साह र कुशवाहको रिटमाथि प्रारम्भिक सुनुवाइ गर्दै निवेदकले नेकपा माओवादी केन्द्र छाडेर अर्को दल गठन गरेको वा अर्को दलमा प्रवेश गरेको यकिन हुन नसकेको भन्दै मेयर पदमा पुनर्वहाली गरिदिएको छ ।

अदालतको अन्तरिम आदेशपछि पूर्वमन्त्री प्रभु साहले स्थानीय तहको जनप्रतिनिधिहरुलाई दल त्यागको नाउँमा पदमुक्त गर्ने कुनै कानुनी व्यवस्था नभए पनि नेकपा माओवादी केन्द्रको अध्यक्ष प्रचण्डले वर्तमान संवैधानिक व्यवस्थालाई छेडछाड गरी देशमा अस्थिरता र अराजकता मच्चाउने उद्देश्यले गरेको कथित कारवाही गलत साबित भएको प्रतिक्रिया दिएका छन्।

उनले आफ्नो फेसबुकमा लेखेका छन् –“विगत लामो सममदेखि स्वेच्छाचारी एवं निरंकुश शैलीमा आफ्नो मनपरीतन्त्र चलाउदै आएका प्रचण्डको आज केवल हार मात्र नभई उनको अनुहारमा एउटा थप कलंकको टिका समेत थपिएको छ । त्यसैले, संवैधानिक व्यवस्था, लोकतन्त्र एवं न्यायको जीत भएको यस ऐतिहासिक घडीमा सम्पूर्ण लोकतन्त्र एवं न्याय पक्षधरहरुमा हार्दिक बधाई दिन चाहन्छु ।