आजैदेखि अन्तराष्ट्रिय हवाई उडान सुरु

न्यूज ब्यूरो । सरकारले विहीवार (आज) देखि थप गन्तव्यमा अन्तर्राष्ट्रिय हवाइ उडान पुनः शुरु गर्ने भएको छ ।

गन्तव्य र तोकिएको रुटमा विहीवारबाटै अन्तर्राष्ट्रिय हवाइ उडान शुरु हुनेछ । मन्त्रालयले जुन ३० सम्मका लागि उडान तालिका समेत सार्वजनिक गरेको छ ।

जसअनुसार विहीवार नेपाल एयरलाइन्सले कतारको दोहा र टर्कीस एयरलाइन्सले इस्तानबुलबाट उडान गर्नेछ । नेपाल वायुसेवा निगमले जुन २७ र २९ मा पनि दोहा उडान गर्नेछ ।

यस्तै, निगमले २५ जुनमा जापान, २८ र ३० जुनमा दुबई उडान गर्नेछ । मन्त्रालयले हिमालय एयरलाइन्सलाई दुबई, क्वालालम्पुर, दमामका लागि उडान संचालन गर्न अनुमति दिएको छ ।

विदेशी एयरलाइन्सतर्फ कतार एयरवेज, टर्किस, जजिरा, फ्लाइ दुबई, सलाम र एयर अरेवियालाई पनि उडान अनुमती दिईएको छ । एयर इन्डियाले जुन २५ मा भारतमा उडान गर्ने छ ।

यस्तै सरकारले अगामी असार १७ गतेदेखि आन्तरिक उडान पनि खुला गर्ने निर्णय गरेको छ । मन्त्रिपरिषद् बैठकले आन्तरिक र अन्तर्राष्ट्रिय उडान खोल्ने निर्णय गरेसँगै संस्कृति, पर्यटन तथा नागरिक उड्डयन मन्त्रालयले असार १७ गतेदेखि आन्तरिक उडान सञ्चालन गर्नका लागि नेपाल नागरिक उडड्डयन प्राधिकरणलाई निर्देशन दिएको छ ।

तर साविकको तुलनामा ५० प्रतिशत मात्र हुने गरि उडान गरिने मन्त्रालयले जनाएको छ । त्यसको व्यवस्थापनको जिम्मा नेपाल नागरिक उड्डयन प्राधिकरणलाई दिइएको छ ।

मन्त्रिपरिषद्को निर्णयपछि विमानस्थल र वायुसेवा कम्पनीले गर्ने टिकेटिङ, उपत्यका बाहिर रहेका वायुसेवा कम्पनीका कर्मचारीलाई उपत्यका फर्कने समय समेत राखेर एक सातापछिबाट उडान शुरु गर्न लागिएको हो ।

सरकारको निर्णयसँगै वायुसेवा कम्पनीले टिकट बिक्री समेत शुरु गरिसकेका छन् । विमान कम्पनीहरूले सत प्रतिशत अकुपेन्सीमा यात्रु उडाउन पाउने प्राधिकरणका प्रवक्ता राजकुमार क्षेत्रीले बताए ।