ब्लड फोर नेपाल (धनुषा) को एक वर्षः के के गरयो महामारीमा ?

न्यूज ब्यूरो, धनुषा । ब्लड फोर नेपाल नामक सँस्थाले कोरोना महामारीमा आम सर्वसाधारणको लागि एक साहारा बनेर कार्य गरेको छ । एक वर्षको कार्यकालमा धनुषाको टिमले विभिन्न कार्यहरु जनाएका छन् ।

ब्लड फोर नेपाल (धनुषा) को टिमले विगत एक वर्षमा धनुषाको ७ ठाउँमा रक्तदान कार्यक्रम सम्पन्न गरेको कार्य प्रगतिमा उल्लेख गरेको छ । धनुषाको लागि सँयोजक अविनाश सिँहले दिएको जानकारी अनुसार गत वर्षको कोरोना महामारीमा स्कूल अफ डिमोक्रेसी क्वीक रिस्पोन्स टिमसँग मिलेर सेवाहरु दिएको उल्लेख गरेको छ ।

जसमा बिरामीको लागि एम्बुलेन्स रगत व्यवस्थापन, रगत सँकलन, विरामीलाई डाक्टरसँग अनलाईन काउन्सेलिँग, विरामीको लागि अक्सिजन, विभिन्न गाउँस्तरमा शिविर, गरिब र असहायलाई सहयोग गरी १ हजार बढी नागरिकलाई सहयोग गरेको जनाएको छ ।

यसका साथै, कोरोनाको दोस्रो लहरमा पनि रक्त व्यवस्थापनदेखि लिएर रातराती जाग्राम बसी पीडित, विरामीलाई अस्पतालसम्म सहयोग गरेको उल्लेख गरेको छ ।

धनुषाको लागि टिमको सदस्य बलराम गुप्ता र राकेश विक्रमको टिमले रेडक्रसको सहयोगमा रक्तदाताको घरसम्मै पुगेर विरामीको ज्यान जोगाएको कार्यप्रगतिमा उल्लेख गरेको छ । ब्लड फोर नेपालको कार्यकाल ३ वर्ष भएको तथा धनुषामा १ वर्षको कार्यकालमा गरिएको उपलब्धीहरुको बारेमा प्रतिवेदन दिएको हो । यो एक वर्षको कार्यकालमा ५०० बढी बिरामीलाई रक्त उप्लब्ध गराएर ज्यान जोगाउ र नयाँ जीवन दिन सफल भएको धनुषा सँयोजक सिँहले जनाएका छन् ।