नेपाल स्काउटमा राजनीतिकरण सहन हुँदैन : उप्रेति

न्यूज ब्यूरो, जनकपुरधाम । नेपाल स्काउट कल्याणकारी समितिले नेपाल स्काउटमा भैरहेको राजनीतिकरण बिरुद्ध प्रेस विज्ञप्ति निकाल्दै सम्बन्धित सबैमा ध्यानाकर्षण गराएको छ ।

नेपाल स्काउटको ऐन, मुल्य, मान्यता र पद्धति बिरुद्ध स्काउटका कामचलाउ नेतृत्व सम्हालेका लोकबहादुर भण्डारीले पार्टीका कार्यकर्तालाई स्काउटको स्थानीय र प्रादेशिक तहको संयोजक र सदस्य नियुक्ति गर्न थाले पछि वर्षौ देखि स्काउटमा लागेका इमान्दार र लगनशील स्काउटहरुको अवमूल्यन भएको जिकिर गरिएको छ ।

स्काउट को ऐन २०५० को १८ ले निर्दिष्ट गरेको भन्दा बाहिर गई पार्टीका कार्यकर्तालाई चकलेट बाडेको जसरि स्काउट अभ्यास र स्काउटिङ्ग नै नबुझेकालाई स्काउट संयोजक र सदस्य नियुक्ति गरेर बालबालिका र युवाहरुको स्वतन्त्र संस्थामा धावा बोलेको भन्ने कुरा नेपाल स्काउट कल्याणकारी समितिका दिवाकर उप्रेतीले प्रेस विज्ञप्तिमा उल्लेख गरेका छन् ।

सरकारको संरक्षणमा रहेका भण्डारीले ऐनको अवमूल्यन गर्दै अघि बढे स्काउटहरु जुनसुकै कदम चाल्न सक्ने र त्यसबाट हुने क्षतिको जिम्मेवारी राष्ट्रिय स्काउट समितिले नै लिन पर्ने उल्लेख गरेका छन् ।

कोभिड–१९ को महामारीसंग जुधिरहेका बेला नेपाल स्काउटलाई हरेक कोणबाट ध्वस्त पार्न रातारात मौका छोपी लागिपरेका गैरस्काउट अवैध कथित वर्तमान नेतृत्व तथा पदिय मर्यादा विपरितका पार्टीका मतियारहरुले अनैतिक र अनर्गल चर्तिकला बढाएको दावि समेत गरिएको छ ।

२०७७ वैशाख १५ गते म्याद गुजिएको राष्ट्रिय तदर्थ समितिले स्थानिय तहमा आफ्ना पार्टीका सदस्य र कार्यकर्तालाई भर्ति गरेर विश्व स्काउटको मूल्य, मान्यता र पद्धति विपरीत कार्य गरेको हामीलाई अवगत नै छ ।

नियम अनुसार विगत लामो समय देखि नेपाल स्काउटका आधिकारिक इकाईहरुमा आवद्ध प्रशिक्षित प्रौढ र युवाहरुलाई अवहेलना गरि नेपाल स्काउटको मर्म विपरित कार्य सम्पादन भएकोमा हामी घोर भत्सना गरेका छन् ।

यस अघि पनि स्काउटहरुले ध्यानाकर्षण पत्र बुझाउने, सम्वाद गर्ने गरेको समेत प्रेस विज्ञप्तिमा खुलाइएका छन् ।