जनकपुरमै 'सरकार कहाँ है रे तु' भन्दै सरकार खोज्दै युवाहरु सडकमा

न्यूज ब्यूरो, जनकपुरधाम । जनकपुरका युवाहरुले मँगलबार प्रदेश सरकारको अगाडी प्रदर्शन गरेका छन् । उनीहरु प्रदेश सरकार खोज्दै मन्त्रालय अगाडी प्रदर्शन गरे ।

स्थानीय युवाहरुले 'प्रदेश सरकार कहाँ है रे तु' भन्दै सरकार खोजेको बताएका छन् । जनकपुरमा अक्जिनको कमीले दिनहुँ नागरिकहरु ज्यान गुमाइरहेको अवस्थामा पनि प्रदेश सरकारले खासै चासो नलिएपछि सरकार खोजेको युवा गणेश साहले बताए ।

महामारीमा अस्पतालकै कर्मचारीहरु सहित सरोकारबालाहरु नै अक्सिजन र रेम्डेसिभिरको कालोबजारी गरिरहेको भएपनि प्रदेश सरकार चुप्पी लादेको भन्दै उनीहरुले सरकार खोज्न बाध्य भएको बताए ।

युवाहरुले कागजमा 'सरकार कहाँ है रे तु' सहितका नारा लेखेर मधेश भवनको मूल गेट अगाडी मौन प्रदर्शन गरेका हुन् । सरकारले विभिन्न समयमा निर्णय मात्र गरेर मिडियाबाजी गर्दै काम भने शून्य गरेको आरोप उनीहरुको छ ।

प्रादेशिक अस्पतालमा औषधी र अक्जिनको समेत कालोबजारी गरी नीजि तर्फ पठाउँदा प्रादेशिक अस्पतालमा नागरिकको अक्सिजनको अभावमा ज्यान जाने गरेको अवस्था रहेको भन्दै तत्काल कारवाहीको माग सहित मौन प्रदर्शन गरेका हुन् ।