सिरहाको लहानमा शसस्त्र प्रहरीको गस्ती, नाकाहरुमा विशेष कडाई

न्यूज ब्यूरो, सिरहा । कोभिडको कारण सिरहा प्रशासनले लगाएको निषेधाज्ञामा सशस्त्र प्रहरी सिरहाले थप कडाई गरेको छ ।

सिरहा जिल्लाको लहान बजारस्थित सशस्त्र प्रहरीले विशेष कडाई गरेको हो । प्रशासनले गत शनिबार राति १२ बजेदेखि जारी गरिएको निषेधाज्ञापछि बजार पूर्णरुपले बन्द रहेको छ ।

कोरोना संक्रमणको दोस्रो लहर तिव्र रुपमा बढि रहेकोले जिल्ला संकट व्यवस्थापन केन्द्रको निर्णयले शनिबार राति १२ बजेदेखि लागू हुने गरी जेठ २१ गतेसम्मका लागि निषेधाज्ञा जारी गरिएको हो ।

निषेधाज्ञा पालना गराउन लहानमा नेपाल प्रहरी र सशस्त्र प्रहरी परिचालन गरिएको छ । लहान प्रवेश गरिने प्रमुख नाका र भित्री सडकहरुमा चेकजाँचका लागि सशस्त्र प्रहरी खटिरहेको सशस्त्र प्रहरी बल लहानको डिएसपी बिनोद थापाले बताए।

सडक क्षेत्रका पसलहरू पूर्णरुपमा बन्द गर्न लगाई लहान पस्ने विभिन्न नाकामा समेत सशस्त्र प्रहरीले निगरानी बढाएपछि निषेधाज्ञा पालना भइरहेको डिएसपी थापाले बताए। चोकचोकमा नेपाल प्रहरी, सशस्त्र प्रहरी र ट्राफिक प्रहरी परिचालन गरिएको छ भने आवत जावत गर्नेहरुको परिचयपत्र जाँचमा समेत कडाइ गरेको छ ।

अति आवशयक काम बाहेक बजारमा हिंडडुल गर्न समेत रोक लागइएको छ । एम्बुलेन्स, बिरामी बोकेको गाडी, शव वाहन र सरकारी नम्बर प्लेटका गाडी बाहेक अन्य सवारी सञ्चालन तथा नयाँ बजार, सब्जीमण्डी, होटल, रेष्टुराँ, सैलुन, ई–रिक्सा समेत सञ्चालनमा रोक लगाइएको छ ।

खाद्यवस्तु, दुध, खाना पकाउने ग्यास, पानी, तरकारी सहितका अत्यावश्यक वस्तु तथा निर्माण सामग्रीका पसलहरु विहान ९ बजेसम्मको लागि खुल्ला गरिएको छ भने औषधी पसल दिन भरी खुला राख्ने निर्णय अनुसार निषेधाज्ञामा कडाई गरिएको हो ।