जनता समाजवादी पार्टीको सँसदीय दलको नेतामा राजेन्द्र महतो भन्ने समाचार भ्रामक

न्यूज ब्यूरो, जनकपुरधाम । जनता समाजवादी पार्टी नेपालले पार्टीको सँसदीय दलको नेतामा राजेन्द्र महतोलाई चयन गरिएको समाचार भ्रामक र मिथ्या रहेको दाबी गरिएको छ ।

जनता समाजवादी पार्टी नेपालले एक प्रेस विज्ञप्ति जारी गर्दै सँसदीय दलको नेता चयन सम्बन्धी कुनै बैठक नभएको तथा दलको नेता चयन नभएको उल्लेख गरेको छ ।

शुक्रबार जसपाको सँसदीय दलको बैठक सम्पन्न भई सँसदीय दलको नेतामा राजेन्द्र महतोलाई चयन समेत गरिएको समाचारप्रति ध्यानाकर्षण भएको जनाउँदै पार्टीले त्यस्तो केही पनि नभएको सूचना जारी गरेको हो ।

जसपाका कार्यकारिणी समितिका प्रकाश अधिकारीद्धारा हस्ताक्षरित विज्ञप्तिमा विभिन्न सँचारमाध्यमहरुमा आएको सँसदीय दलको नेता चयन सम्बन्धीको समाचार भ्रामक अफवाह मात्र रहेको दाबी गरिएको हो ।

पार्टीको अन्तरिक विधान २०७७ को धारा २८ को उपधारा (३) बमोजिम पार्टीमा सँसदीय दलको लागि विधान अनुमोदित अनिवार्य हुनुपर्ने भएपनि हालसम्म यस सम्बन्धी कुनै विधान नबनेको भन्दै सँसदीय लको नेता समेत चयन नभएको उल्लेख गरिएको छ ।

केही सँचारमाध्यमहरुले शुक्रबारदेखि नै जनता समाजवादी पार्टी नेपालको सँसदीय दलको नेतामा राजेन्द्र महतोलाई चयन गरिएको भनेर प्रचारवाजी गरेको थियो ।