कमला नगरपालिकाको लक्कडमा कोरोनाले एकको मृत्यू, घरको पाँच जनामा पनि कोरोना

न्यूज ब्यूरो, धनुषा । प्रदेश २ को धनुषा जिल्लाको कमला नगरपालिकास्थित एकै परिवारको पाँच जना कोरोनाबाट सँक्रमित भएका छन् भने एक सदस्यको कोरोनाबाट मृत्यू पनि भएको छ ।

कमला नगरपालिका वडा नम्बर ५ लक्कड टोलस्थित एकै परिवारमा ८ सदस्यमध्ये एक जनाको मृत्यू भएको छ भने अन्य ५ जनाको कोरोना रिपोर्ट पोजिटिभ आएको हो ।

कमला नगरपालिकाका स्वास्थ्य सँयोजक सत्यनारायण ठाकुरका अनुसार लक्कड स्थित गत बैशाख २५ गते ५० बर्षिय पुरुषको मृत्यू भएको थियो । उनकै परिवारमा बच्चादेखि व्यसकसम्मलाई कोरोना पोजिटिभ देखिएको हो ।

मृतकको परिवारका सदस्यहरुमध्ये ७ महिने बच्चा, १७ महिने बच्चा सहित २७ बर्ष, २४ बर्षिय, २२ बर्षिय गरी ५ जनामा कोरोना पुष्टि भएको हो । पुरुषको मृत्यूपछि उनको परिवारजनमा गरिएको पिसिआर टेष्टको क्रममा पाँच जनाको रिपोर्ट पोजिटिभ आएको हो । सोही परिवारको दुई जनाको रिपोर्ट भने नेगेटिभ आएको हो ।

स्थानीयहरुका अनुसार, कोरोना पोजिटिभ आएका व्यक्तिहरु यसअघि विभिन्न ठाउँमा स्थानीयहरुसँग सम्पर्कमा रहेका थिए । उनीहरुको कोरोना रिपोर्ट आउनुभन्दा अघि त्यो टोलका दर्जनौ व्यक्तिहरुसँग सम्पर्कमा आएको बताएका छन् ।

उनीहरुको हरकत बढेपछि कमला नगरपालिकाका मेयर राम उदगार गोईतले होम आईसोलेशनमा बस्नको लागि निर्देशन दिएको तथा वडाध्यक्ष शिवा पासावनले समेत उनीहरुलाई घरभित्रै आईसोलेट हुन कडा निर्देशन दिएको बताइएको छ ।

सोही क्रममा नगर प्रमुख गोईतले टोलमा कोरोना पोजिटिभ व्यक्तिहरु भएकोले आ–आफ्नो घरमा बस्न तथा जथाभावी घुमफिर नगर्न टोलवासीलाई आग्रह गरेका छन् ।