नीजि अस्पतालहरुलाई प्रदेश सरकारको नियन्त्रणमा लेउ, उपचार नगरे सील गरिदेउ

सम्पादकीय । अरु बेला दलाल लगाएर बिरामी तानातान गरी आम सर्वसाधारणबाट मोटो रकम असुल्दै आएका नीजि अस्पतालहरुलाई प्रदेश २ को सरकारले प्रदेश सरकारको नियन्त्रणमा लिनुपर्छ ।

कोभिड–१९ को दोस्रो लहर चलिरहँदा उपचार नपाएर धनुषाका एक जना पुरुष अकालमै ज्यान गुमाएको छ । यता, वर्तमान केन्द्र सरकारले नेपालमा उपचारको अभावमा कसैको ज्यान नजाने दाबी गरिरहँदा धनुषा जनकपुरमा मँगलबार मात्र एक पुरुष अस्पताल नपाएर ज्यान गुमाए ।

नागरिक सुरक्षाका निम्ति कटिबद्ध हुनुपर्ने प्रदेश सरकारले नीजि स्वास्थ्य संस्थालाई नियन्त्रणमा राखेर कोरोना सँक्रमितको सही उपचारको लागि अग्रसर हुनुपर्छ । मन्दिर, मस्जिद, पोखरीमा मात्र आधाभन्दा बढी बजेट छुटयाएका प्रदेश सरकारले अहिले पनि नीजि अस्पतालहरुलाई नियन्त्रणमा लिनु आवश्यक छ ।

सरकारले आफ्नो मातहतमा ती अस्पतालहरुलाई लिएर कोरोनाको उपचार सुरु गर्नु अहिलेको नितान्त आवश्यकता हो । प्रदेश २ को सरकारले जनकपुर सहित अन्य विभिन्न सहरमा सँचालनमा रहेको प्राइभेट अस्पतालहरुलाई यथाशिघ्र आफ्नो मातहतमा लिनुपर्छ ।

कोरोना सँक्रमित भएको आशँका गर्ने र अस्पतालमा भर्ना नै नलिने प्रवृति मात्र होइन अमानवीय व्यवहारप्रति प्रदेश सरकार कडा हुनु आवश्यक छ । महामारीका बेला अस्पताल सिन्डीकेटमा खोल्ने, भर्ना नलिने, उपचार नगर्ने जस्ता क्रियाकलापले अस्पतालको कुशलताप्रति पनि प्रश्न चिन्ह उठेको छ ।

अन्य समयमा दलाल लगाएर, कमिशन दिएर विरामीलाई खोजी खोजी ल्याउने ती प्राइभेट अस्पालहरु, अस्पालमा विरामी ल्याएर जबरदस्ती पैसा असुल्ने प्राइभेट अस्पतालहरुले अलिक पनि मानवता देखाउने समय आएको छ ।

यदि यस्तो समयमा पनि प्रदेश सरकारले नीजि अस्पतालहरुलाई आफ्नो मातहतमा लिएनन भने प्रदेश सरकार पनि सो अस्पतालसँग मिलेरै काम गर्ने गरेको भनेर जनआवाज उठन बेर लाग्दैन् । महामारीमा उपचार नगर्ने त्यस्ता अस्पतालको दर्ता खारेज गर्ने हैसियत प्रदेश सरकारको हुनुपर्छ । उपचार अभावमा अकालमै अब थप कसैले ज्यान गुमाउन नपरोस् ।