सिरहा युवा संजालले जिल्ला स्तरीय हाजिरी जवाफ प्रतियोगिता गर्दै

बिनय यादव, सिरहा, १७ फागुन । सिरहाका युवाहरुद्वारा गठित संस्था सिरहा युवा संजालले जिल्ला स्तरीय हाजिरी जवाफ प्रतियोगिता गर्ने भएको छ । संजालले यही आउँदो फाल्गुन २४ गते सिरहाको नरहा गाउँपालिका ४ मा अवस्थित श्री जनता बनवाली उमावि बर्छवाको प्राङ्गणमा जिल्ला स्तरीय हाजिरी जवाफ प्रतियोगिता गर्न लागिएको हो ।

हाजिरी जबाफ प्रतियोगितामा प्रथम हुने विद्यालयका सहभागी ३ जना विद्यार्थीलाई कक्षा ११ र १२ पढ्नका लागि १०० प्रतिशत छात्रवृत्ति, द्वितीय हुने विद्यालयका ३ जना विद्यार्थीलाई ८० प्रतिशत छात्रवृत्ति, तृतीय हुने विद्यालयका ३ जना विद्यार्थीलाई ६० प्रतिशत छात्रवृत्तिको व्यवस्था मिलाइदिइने र सहभागी विद्यालयलाई मायाको चिनो तथा प्रमाणपत्रको व्यवस्था समेत गरिएको सिरहा युवा संजालका अध्यक्ष नागेश्वर रायले बताउनुभयो ।

हाजिर जवाफ प्रतियोगिताका लागि ब्लुबर्ड कलेज काठमाडौ, पब्लिक युथ क्याम्पस जनकपुर, आशिफ कम्प्युटर ईन्स्टिच्युट गोलबजारले छात्रवृत्तिको सौजन्य गरेको र सिरहाका स्थानीय शैक्षिक संस्थाहरुले आर्थिक सहयोग गरेको सिरहा युवा संजालका महासचिव संतोष यादवले जानकारी दिए ।

साथै, हाजिरी जवाफ प्रतियोगितामा भाग लिन चाहने विद्यालयहरुले ९८२३७२७४२३, ९८१५७५१७०८ र ९८६९०६७६९४ मा सम्पर्क गरि आवेदन दिन सकिने आयोजकले जनाएको छ ।