शहिदनगर धनुषा जिल्लाकै पहिलो 'पूर्ण खोप सुनिश्चित नगरपालिका' घोषणा

न्यूज ब्यूरो, जनकपुरधाम । प्रदेश नम्बर २ को धनुषा जिल्लास्थित रहेको शहिदनगर नगरपालिकालाई जिल्लाकै पहिलो पूर्ण खोप सुनिश्चित नगरपालिका घोषणा गरिएको छ ।

शुक्रबार शहिदनगर नगरपालिकाद्धारा आयोजना गरिएको पूर्ण खोप सुनिश्चित नगर घोषणा कार्यक्रम अन्तर्गत शहिदनगर नगरपालिकाको ९ वटै वडामा पूर्ण खोप लागू गरिएपछि घोषणा गरिएको हो ।

वडा–वडा गरी पूर्ण खोप सुनिश्चित घोषणा गरेपछि शुक्रबार पूर्ण खोप सुनिश्चित नगरपालिका घोषणा गरिएको हो । शहिदनगर नगरपालिका भित्रको सबै बालबालिकाहरुसम्म खोपको पूर्ण पहुँच भएको भन्दै पूर्ण खोप सुनिश्चित नगरपालिका घोषणा गरिएको हो ।

नगरपालिकालाई सँघीयतापछिको जिल्लाकै पहिलो पूर्ण खोप सुनिश्चित नगरपालिकाको रुपमा घोषणा गरिएको हो । धनुषा जिल्लाकै पहिलो पुर्ण पोषित स्वास्थ्य संस्था घोषणा समेत गरिएको हो ।

नगरपालिकाका नगर प्रमुख उदय कुमार बरबरिया (यादव) को अध्यक्षता तथा जिल्ला समन्वय समितिको सभापति एवम् जिल्ला खोप समन्वय समितीको संयोजक रामदेब बनरैत यादवको प्रमुख आतिथ्यमा शहिदनगरलाई पूर्ण खोप सुनिश्चित नगर घोषणा गरिएको हो ।

नगरभित्र रहेको १६ महिनादेखि २३ महिनासम्मको बालबालिकाहरुमा नेपाल सरकारले प्रदान गर्ने खोपको पूर्ण पहुँच भएको वा नभएको भनेर नीरिक्षण पश्चात शतप्रतिशत भएमा पूर्ण खोप सुनिश्चित गरिने प्रावधान अनुसार शहिदनगरलाई जिल्लाकै पहिलो नगर घोषणा गरिएको हो ।

सो घोषणा कार्यक्रममा बोल्दै जिल्ला समन्वय समितिका सभापति रामदेव बनरैत यादवले जिल्लामै पहिलो शहिदनगरले स्वास्थय क्षेत्रको खोप तर्फ फडको हानेको भन्दै नगरपालिकाका जनप्रतिनीधि र कर्मचारीलाई प्रशँसा गरे ।

उनले धनुषा जिल्लामै शहिदनगर नगरपालिकाले सम्पूर्ण बालबालिकाहरुमा खोपको पहूँच बनाएर नेपाल सरकारको लगानीलाई उपलब्धी दिएको भन्दै नगर प्रमुख उदय कुमार बरबरियालाई मँचमै खुलेर प्रशँसा गरे ।

उनले नगरपालिकाको कर्मचारी, स्वास्थ्यका सँयोजक कपिलदेव अधिकारी र सह सहँयोजक राम सिकिल यादव सहित अन्य स्वास्थ्यकर्मीको आँट र कार्यप्रति कृतज्ञता प्रकट गर्दै आवश्यक अन्य सहयोगको प्रतिवद्धता समेत जाहेर गरे ।

सो कार्यक्रममा बोल्दै नगर प्रमुख बरबरियाले शहिदनगरले देखेको समृद्धिको सपनालाई साकार पार्नको लागि स्वासथ्य क्षेत्रमा बलियो हुनु आवश्यक रहेको भन्दै बालबालिकामा पूर्ण खोपको पहुँच बनाएर खुट्टा बलियो बनाएको बताए ।

उनले स्वास्थय क्षेत्रमा बलियो भएपछि अन्य क्षेत्रलाई पनि अब बलियो भएर लागे शिघ्र नै शहिदनगर नगरपालिका समृद्धिको परिकल्पनालाई थप बल पुरयाउने बताए ।

“जिल्लाकै पहिलो नगरपालिका हो शहिदनगर नगरपालिका, जसले पूर्ण खोप सुनिश्चितता गरेको छ । हाम्रा नगरपालिकाभित्रका बालबालिकाहरुलाई सरकारले दिने सबै खोपको सहज पहुँच बनाउन सफल भएका छौं । यसको लागि हाम्रा नगरपालिकाको सम्पूर्ण स्वास्थ्यकर्मी, कर्मचारी, स्वयँसेवीका धन्यवाद र प्रशँसाका पात्र हुन् । उहाँहरुकै अहोरात्र मिहिनेतले यो सम्भव भएको छ ।”– उनले भने ।

स्वास्थयकर्मीहरुप्रति कृतज्ञता जाहेर गर्दै मेयर बरबरियाले स्वास्थ्यकर्मीहरुलाई अब थप प्रोत्साहन गर्नको लागि अगल कार्यक्रम र प्रोत्साहन भत्ता थप गर्ने बताए । उनले कर्मचारी र स्वास्थ्यकर्मीप्रति आभार प्रकट गरे ।

पूर्ण खोप सुनिश्चित घोषणा समारोहमा नगरपालिकाका प्रमुख प्रशासकीय अधिकृत सत्रुध्न यादवले स्वास्थ्यकर्मीहरुले निभाएको जिम्मेवारी पूर्ण प्रशँसनीय रहेको बताए । उनले नगरका स्वास्थ्यकर्मीहरुको लगाव, मिहिनेतको प्रतिफल जिल्लाकै पहिलो पूर्ण खोप सुनिश्चित घोषणा भएको बताए ।

समारोहमा स्वास्थ कार्यालयको खोप सुपरभाइजर अधिकृत राजदेव यादब, नगरकी उपमेयर शिला देवी कापर, सबै वडाका वडाध्यक्ष, नगरपालिकाका कर्मचारी, स्वयँसेविकाहरु सहित स्थानीयहरुको समेत सहभागीता रहेको थियो ।