जनकपुरमा 'रामअशिष' फार्मूला लागू

न्यूज ब्यूरो ||
जनकपुरधाम, १५ फागुन । प्रदेश नं. २ मा विस्तारै सफाई अभियानका महाअभियन्ता राम अशिष यादवको फार्मूला लागू हुँदै देखिएको छ ।

आज प्रदेश २ को राजधानी जनकपुरमा आव्हान गरिएको बृहत अर्थात महासरसफाई अभियानमा हजारौँ युवा, विद्यार्थी सहित मुख्यमन्त्री समेतले रामअशिष फार्मूला लाई लागू गर्दै कुचो सहित सडकमा आएको देखिए ।

जनकपुरको जनक चौकवाट शुरु भएको महा–सरसफाई अभियानमा सहभागि भएकाहरुले नगरको विभिन्न भागहरुमा हातमा कुचो लिएर सरसफाई गरेका छन् ।

नीजि तथा अवासीय विद्यालय एशोसिएशन प्याब्निल एन प्याब्सन सहितको दर्जनौ सामाजिक संघ संस्थाहरुको आयोजनामा भएको सरसफाई पछि जनकपुर निक्कै सफा देखिएको छ ।

मुख्यमन्त्री मो. लालबाबू राउत, महान्यायधिवक्ता दीपेन्द्र झा सहित गँगा सागर सफाई अभियान तथा क्लीन एण्ड ग्रीन जनकपुरका अभियन्ता समेत रहेका समाजसेवी तथा प्रदेश सभा सदस्य रामअशिष यादवसँगै कुचो समातेर जनकपुर सफाई गर्न दौडिए ।

मुख्यमन्त्रीले जानकी मन्दिरको सफाई समेत गरे । यसका साथै अन्य मठ मन्दिरहरुको वरीपरि समेत सफाईलाई मध्यनजर गर्दै कुचो चलाएको देखियो ।

जनकपुरको पौरणिक ईतिहास डुब्न लागिरहेको समय यादवले अगुवाई गरी गँगासागरबाट सफाई अभियान चलाउँदै आज जनकपुरलाई पुनः पौरणिक दृष्टिकोणले नै हेर्न बाध्य बनाएको छ ।

सरसफाई अभियानको आफै सरसफाई गरेर शुभारम्भ गर्दै प्रदेश नंं २ का मुख्यमन्त्री लालबाबु राउतले जनकपुर विश्वका हिन्दुहरुका लागि आस्थाको केन्द्र विन्दु भएकाले यस ठाउँमा महासरसफाई अभियान निरन्तर रुपमा नै हुनु पर्ने धारणामा राखे।

प्रदेशको राजधानी जनकपुरधाम भएका कारणले पनि राजधानीलाई सफा र सुन्दर बनाउने दायित्व प्रदेश सरकारको पनि भएका कारणले यस्तो कामकालागि पूर्ण समर्थन तथा सहयोग रहने थपे ।

जनकपुरधाममा समापन हुन लागेको नेपाल भारतको सवै भन्दा लामो धार्मिक पदयात्रा माध्यमिकी मिथिला परिक्रमामा सहभागि भएका हजारौ भक्तजनहरु १५ दिनको परिक्रम सकेर आउन लागेको पूर्व सन्ध्यामा भएको सो महा–सरसफाई अभियानलाई निरन्तरता दिन जरुरी रहेको जनकपुर सफाई अभियानका अगुवा एवम् अभियन्ता यादवले बताए ।