सिरहामा डाक्टरको लापरवाहीले वृद्धको मृत्यू, 'डा. यादव' फरार

न्यूज ब्यूरो, सिरहा । प्रदेश नम्बर २ को सिरहामा चिकित्सकको लापरवाहीले एक जनाको ज्यान गएको भन्दै परिवारजनले क्लीनिक घेराउ गरेको हो ।

पूर्व पश्चिम राजमार्ग अन्तर्गत सिरहा जिल्लाको नरहा गाउँपालिका वडा नम्बर ३ चोहर्बा स्थित रहेको अनुराधा हेल्थ केयर एण्ड डाइग्नोस्टिक सेन्टरमा भर्ना गरिएका एक वृद्धको ज्यान गएपछि परिवारजनले डाक्टरको लापरवाहीको आरोप लगाएको हो ।

नरहा गाउँपालिका वडा नम्बर ३ डन्डाटोल बस्ने अन्दाजी बर्ष ६५ का रामसुफल महतोको विहिवार साँझै मृत्यूपछि परिवारजनले चिकित्सकको लापरवाही बताएको हो ।

सही समयमा उपचार नै नगरी अल्झाएर महतोलाई राखेपछि उनको ज्यान गएको मृतकका छोरा लालबिहारी महतोले बताए । उनले उपचारमा सँलग्न डाक्टर सँजय यादवले विरामीलाई ३ दिनसम्म अल्झाएर भर्नामा राखेपछि मृत्यू भएको बताए ।

उच्च रक्तचाप भएर गत सोमबार सो हेल्थ केयरमा भर्ना गरिएका महतोको अवस्था जटिल बन्दै गएपनि पैसाको लोभमा अल्झाएर राखेको आरोप लगाइएको छ ।

महतोलाई भर्ना गरिएपनि स्वास्थ्यमा कुनै प्रकारको सुधार नआएको तथा झन अवस्था जटिल हुँदै गएपछि रिफरको लागि उनका छोरा लालबिहारीले डाक्टर सँजय यादवलाई दबाब दिएका थिए, तर डाक्टर यादवले भने उनलाई रेफर नगरेको आरोप लगाएको हो ।

“जसोतसो मिलाएर वडा नम्बर ३ का वडाध्यक्ष अनिसुल मियाँलाई बोलाएर ल्यायौं, त्यसपछि क्लीनिकबाट रेफर गरयो , बुवालाई विराटनगर लैजादै गर्दा बाटोमै प्राण त्यागे । डाक्टर सँजय यादवको जबरदस्तीले बुवाको ज्यान गएको छ । कारवाही हुनुपर्छ ।”– लालबिहारीले भने ।

यता, मृतक महतोको उपचारमा क्लीनीकमा खटेका डाक्टर सँजय यादव क्लीनिकबाट विहिबार साँझ नै फरार भएको बताईएको छ । सँचालनमा रहेको सो क्लीनिकले विरामीलाई भर्नामा राखिएको थियो ।

क्लीनिकले विरामी भर्ना गर्न पाउने कानुन नरहेपनि उनलाई भर्ना गरी राखिएको थियो । यसको बारेमा अनुसन्धान थालिएको जिल्ला प्रहरी कार्यालय सिरहाले जनाएको छ ।