पत्रकार महासँघको केन्द्रीय समितिले धाँधली गरयो : प्रेस मँच नेपाल

न्यूज ब्यूरो, जनकपुरधाम । जनता समाजवादी पार्टीको भातृ सँगठन प्रेस मँच नेपाल (Press Munch Nepal) ले नेपाल पत्रकार महासँघको केन्द्रीय समितिले सदस्यता वितरणमा धाँधली गरेको आरोप लगाएको छ ।

प्रेस मँच नेपालका केन्द्रीय महासचिव निमेश कर्णद्धारा हस्ताक्षरित प्रेस विज्ञप्तिमा महासँघको विधानलाई अटेर गरी केन्द्रीय समितिले जिल्ला शाखाहरुको अधिकारलाई समेत कुण्ठित गरेको आरोप लगाएको हो ।

महासँघका केन्द्रीय अध्यक्ष एवम् महासचिवले राजनीतिक आस्थावाट अभिप्रेरित भएर आ–आफ्नो संगठनको मतदाता बढाउने उद्देश्यले जिल्ला शाखाहरुको सर्वसम्मत निर्णय विपरित क्रियाशील पत्रकारहरुलाई बेवस्ता गरी नवीकरण तथा नयाँ सदस्यता वितरणमा धाँधलीपूर्ण रबैया देखाएको उल्लेख छ ।

“केन्द्रीय समितिले जारी गरेको नामावलीअनुसार मुलुक भरिकै प्रायः शाखाहरुको निर्णायलाई बाईपास गर्दै आफुखुसी मनपरी गर्नु र विधान समेतलाई उल्लंघन गर्ने कार्य घोर निन्दनीय छ । नेपाल पत्रकार महासंघ मुलुकभरीका पत्रकारहरुको आस्था रहेको साझा संस्था हो, यस संस्थालाई भोटको राजनीतिका निम्ति प्रयोग गर्नु अत्यन्तै दुर्भाग्यपूर्ण छ । ”– विज्ञप्तिमा उल्लेख छ ।

महासंघको विधानले केन्द्र,प्रदेश तथा जिल्ला शाखाहरुलाई प्रदान गरिएको अधिकार र दायित्व क्षेत्रलाई हृदयंगम गर्दै केन्द्रले गरेको यो विभेदपूर्ण निर्णय अविलम्ब सच्याउन केन्द्रीय समितिलाई आग्रह विज्ञप्ति मार्फत गरेको हो।

'महासंघ (FNJ) को प्रतिष्ठा गरिमामा समेत आँच आउने गरि गरिएको यस प्रकारको अवैधानीक कृयाकलाप कुनै हालतमा स्वीकार्य हुन सक्दैन । अन्यथा केन्द्र, प्रदेश र जिल्ला शाखाहरूको आगामी निर्वाचन समेतलाई अवरूद्ध गर्ने गरी प्रेस मञ्च नेपाल सशक्त आन्दोलन गर्न बाध्य हुने व्योहोरा यसै विज्ञप्तिमार्फत् जानकारी गराउन चाहन्छौं ।”– विज्ञप्तिमा भनिएको छ ।