गोरखा र पोखरामा बंगलादेशी मुस्लिम धर्मगुरुको ट्रेनिङग, डोटीमा चर्चको आराधना

न्यूज ब्यूरो, जनकपुरधाम । गोरखा र पोखराका मस्जिदमा बंगलादेशी मुस्लिम धर्मगुरुहरूको टोली धार्मिक गतिविधिमा सहभागी भएको छ । यस्तै, डोटीस्थित एक चर्चमा विशेष आराधना तथा संगीत कार्यक्रम आयोजना गरिएको छ ।

गोरखा नगरपालिका–६, हरमटारीस्थित जामे मस्जिदमा बंगलादेशका मुस्लिम धर्मगुरु मोहम्मद दाउद इस्लामसहित पाँच जनाको टोली केही दिनदेखि धार्मिक गतिविधिमा सक्रिय रहेको बताइएको छ । टोलीले मुस्लिम धर्मावलम्बीहरूलाई धार्मिक अनुशासनसम्बन्धी जानकारी दिनुका साथै सामूहिक नमाजमा सहभागी भएको जनाइएको छ ।

यसैगरी, पोखराको मानवअधिकार चोकस्थित जामे बिलाल मस्जिदमा पनि बंगलादेशी तथा फिलिपिन्सका मुस्लिम धर्मगुरुहरूको टोलीले धार्मिक गतिविधि गरेको बताइएको छ । बंगलादेशका मोहम्मद शेख बक्तियार रहमानसहित छ जना र फिलिपिन्सका जमाल सोलाइमान अब्दुल्लाहसमेत सात जनाको टोलीले झण्डै तीन दर्जन मुस्लिम धर्मावलम्बीलाई धार्मिक ज्ञान प्रदान गर्नुका साथै नमाज पढाएको जनाइएको छ ।

उता, डोटीको सिलगढी नगरपालिका–३, दिपायलस्थित आशिष चर्चमा विशेष आराधना तथा संगीत कार्यक्रम आयोजना गरिएको छ । पास्टर गर्भलाल तामाङको अध्यक्षतामा सम्पन्न कार्यक्रममा करिब ४५ जनाको सहभागिता रहेको बताइएको छ ।

कार्यक्रममा सहभागीहरूलाई प्रशिक्षण दिनुका साथै धार्मिक प्रवचन, भजन, कोरस गायन र सामूहिक प्रार्थनामार्फत आराधना गरिएको जनाइएको छ ।

मस्जिदमा भएका धार्मिक गतिविधि तथा चर्चमा आयोजित कार्यक्रमबारे जनआस्था पत्रिकाले अनलाईन सँस्करणमा समाचार प्रकाशित गरेको छ ।

“गोरखा र पोखराका मस्जिदमा बंगलादेशी तथा अन्य देशका मुस्लिम धर्मगुरुहरूको टोली धार्मिक गतिविधिमा सहभागी भएको विवरण सार्वजनिक भए पनि उनीहरू तब्लिगी जमातसँग आबद्ध रहेको नरहेको बारे खुलेको छैनन् ।