नेपाल–भारत बोर्डर आज र भोली पूर्ण रुपमा बन्द, आवतजावत गर्न नपाउने

न्यूज ब्यूरो, जनकपुरधाम । भारतको बिहारमा विधान परिषद् सदस्य (एमएलसी) निर्वाचनलाई लक्षित गर्दै नेपाल–भारत सीमा नाका २४ घण्टाका लागि बन्द गरिएको छ ।

नेपाल प्रहरीले दिएको जानकारीअनुसार सीमा बन्द गरिएपछि नेपालबाट भारत र भारतबाट नेपालतर्फ हुने आवतजावत रोकिएको छ ।

बिहारमा भोली अक्टोबर २३ मा विधान परिषद्का आठ सिटका लागि मतदान हुँदैछ । निर्वाचनलाई शान्तिपूर्ण र व्यवस्थित बनाउन सीमा क्षेत्रमा सुरक्षा व्यवस्था कडा पारिएको हो ।

सीमा बन्दको अवधिमा सर्वसाधारणको आवतजावत प्रभावित हुने भएकाले भारततर्फ जाने वा नेपाल फर्किने यात्रुले सम्बन्धित सुरक्षा निकायसँग आवश्यक जानकारी लिएर यात्रा गर्न आग्रह गरिएको छ ।

आजदेखि बन्द गरिएको बोर्डर भोली बेलुकी ८ बजेसम्मको लागि बन्द भएको जनाईएको छ । भारत बिहारसँग जोडिएको सीमानाका आज र भोली बन्द रहने भएको छ ।