Lover सँग विवाह गर्न मोबाइल टावरमा चढिन् साईदा खातुन, चार घण्टापछि Video Call बाट निकाह

न्यूज ब्यूरो, जनकपुरधाम । प्रेमीसँग विवाह गर्न परिवारले अस्वीकार गरेपछि भारतको उत्तर प्रदेशमा एक १८ वर्षीया युवती मोबाइल टावरमा चढेकी छन् । शुक्रबार बिहान टावरमा चढेकी युवतीले परिवार विवाहका लागि सहमत भएपछि प्रेमीसँग भिडियो कलमार्फत निकाह गरेकी हुन् ।

प्राप्त विवरणअनुसार, मोतीपुर थाना क्षेत्रकी साइदा नामकी युवती सोही गाउँका २१ वर्षीय नुरुद्दिनसँग प्रेम सम्बन्धमा थिइन् । नुरुद्दिन हाल रोजगारीका सिलसिलामा मुम्बईमा छन् । सामाजिक तथा सामुदायिक भिन्नताका कारण दुवै परिवार उनीहरूको विवाहको विपक्षमा थिए ।

परिवारले विवाहका लागि सहमति नजनाएपछि साइदा शुक्रबार बिहान करिब ६ बजे गाउँकै मोबाइल टावरमा चढेकी थिइन् । घटनाको जानकारी पाएपछि प्रहरी, छिमेकी र गाउँले घटनास्थल पुगेका थिए । उनीहरूले युवतीलाई तल ओर्लिन आग्रह गरे पनि विवाह नभएसम्म नओर्लिने अडान उनले लिएकी थिइन् ।

त्यसपछि प्रहरीले दुवै पक्षका अभिभावकलाई बोलाएर छलफल गराएको थियो । करिब चार घण्टाको प्रयासपछि दुवै परिवार विवाहका लागि सहमत भएका थिए । त्यसपछि काजीलाई बोलाएर मुम्बईमा रहेका नुरुद्दिनसँग भिडियो कलमार्फत अनलाइन निकाह सम्पन्न गराइएको विवरणमा उल्लेख छ ।

निकाह सम्पन्न भएपछि बिहान करिब १० बजे साइदा सुरक्षित रूपमा टावरबाट तल ओर्लिएकी थिइन् ।

मोतीपुर थानाका प्रहरी निरीक्षक ब्रह्मा गोन्डका अनुसार युवतीको सुरक्षालाई प्राथमिकतामा राख्दै स्थानीयवासीको सहयोगमा घटनाको समाधान गरिएको हो ।