बिहारमा एमएलसी निर्वाचनः नेपाल–भारत सीमा नाका बन्द, जनकपुर–जयनगर रेल सेवा सञ्चालनमै

न्यूज ब्यूरो, जनकपुरधाम । भारतको बिहारमा विधान परिषद् सदस्य (एमएलसी) निर्वाचनलाई लक्षित गर्दै नेपाल–भारत सीमा नाका २४ घण्टाका लागि बन्द गरिएको छ । तर, जनकपुर–जयनगर रेल सेवा भने सञ्चालनमै रहेको जनाइएको छ ।

बिहारमा अक्टोबर २३ अर्थात् आज विधान परिषद्का आठ सिटका लागि मतदान हुने भएकाले निर्वाचनलाई शान्तिपूर्ण र व्यवस्थित बनाउन सीमा नाकामा आवागमन रोकिएको हो ।

सीमा नाका बन्द गरिएसँगै नेपालबाट भारत र भारतबाट नेपालतर्फ हुने नियमित आवागमन प्रभावित भएको छ । सीमा क्षेत्रमा सुरक्षा व्यवस्था कडा पारिएको छ भने यात्रुहरूलाई यात्रा गर्नुअघि सम्बन्धित सुरक्षा निकायसँग जानकारी लिन आग्रह गरिएको छ ।

धनुषा प्रशासनका अनुसार बिहीबारदेखि बन्द गरिएको सीमा नाका शुक्रबार बेलुकी ८ बजेसम्म बन्द रहने जनाइएको छ ।

यद्यपि, जनकपुर–जयनगर रेल सेवा सञ्चालनमै रहेको छ । नेपाल रेल्वे कार्यालय जनकपुरले रेल सेवा सँचालनमै रहेको जनाएको छ ।