जनकपुरः ट्रिपरले ठोक्दा टेम्पो चालकको घटनास्थलमै मृत्यू !

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुरधामदेखि केही दुरीमा रहेको धनुषाको बहडरीमा सवारी दुर्घटना हुँदा एक जनाको ज्यान गएको छ ।

शनिबार बेलुका पूर्व–पश्चिम राजमार्ग अन्तर्गत धनुषाको मिथिला नगरपालिका–८ बडहरी पुल नजिक ट्रिपरले टेम्पोलाई ठक्कर दिएपछि चालकको घटनास्थलमै मृत्यू भएको हो ।

पश्चिमबाट पूर्वतर्फ आउँदै गरेको ना ८ ख ७२२२ नम्बरको टिपरले पूर्वबाट पश्चिमतर्फ जाँदै गरेको प्रदेश २–०३–००१ स ५४७५ नम्बरको तीनपांग्रे अटो टेम्पोलाई ठक्कर दिँदा अटो चालकको घटनास्थलमै ज्यान गएको प्रहरीले जनाएको छ ।

ज्यान जानेमा महोत्तरीको बर्दिबास नगरपालिका वडा नम्बर १ का अटो चालक विर बहादुर तामाङ्ग रहेको इलाका प्रहरी कार्यालय ढल्केवरका प्रहरी निरीक्षक तिर्थ कुमार कार्कीले बताएका छन् ।

मृतकको शव पोष्टमार्टमका लागि प्रादेशिक अस्पताल जनकपुर पठाइएको ईलाका प्रहरी कार्यालय ढल्केवरले जनाएको छ ।