भोलीदेखि उठ्ने १५ दिने परिक्रमाको सबै व्यवस्थापन गरियो : मेयर यादव

न्यूज ब्यूरो, जनकपुरधाम । नेपालकै सबभन्दा ठुलो धार्मिक पदयात्रा मधेशको महाकुम्भ भनेर प्रसिद्ध १५ दिने माध्यमिकी परिक्रमा भोली शनिबारदेखि प्रारम्भ हुने भएको छ ।

मधेशको महाकुम्भ मानिने ऐतिहासिक तथा धार्मिक १५ दिने माध्यमिकी परिक्रमा शनिबारदेखि प्रारम्भ हुनेभएपछि स्थानीय सरकारको हैसियतले मिथिलाबिहारी नगरपालिकाले श्रद्धालुहरुको लागि विशेष व्यवस्था गरेको जनाइएको छ ।

मिथिला बिहारी नगरपालिका वडा नम्बर ८ ठेरा कचुरी स्थित रहेको मिथिलाबिहारीको मन्दिरबाट उठने डोला व्यवस्थापन सहित साधुसन्त र श्रद्धालु व्यवस्थापनको लागि नगर प्रमुख अनिल कुमार यादवले विेशेष व्यवस्था गरेको जनाएका छन् ।

न्यूज ब्यूरोसँगको सँक्षिप्त कुराकानीमा मेयर यादवले शनिबार बिहानै मिथिला बिहारीको डोला उठने भएपछि एकसाता अघिदेखि नै तयारी सुरु गरिएको जानकारी दिए ।

उनले मिथिला बिहारीको मन्दिर प्राँगन सहित वरपरको सरसफाई गरिएको जनाउँदै साधुसन्त व्यवस्थापन, पूजा अर्चना व्यवस्थापन, डोला व्यवस्थापनको लागि नगरपालिकाले बजेट विनियोजन गरेको बताए

स्थानीय सरकार गठन भएदेखि मिथिला बिहारीको डोलाको लागि आउने साधुसन्त र परिक्रममा सहभागी हुने श्रद्धालुहरुको तत्कालको व्यवस्थापन नगरपालिकाको तर्फबाट हुने गरेको बताए ।

उनले शनिबार विहानैदेखि उठने परिक्रमाको लागि टेन्ट, सजाबट, लाईट, प्रसाद व्यवस्थापन, श्रद्धालुहरुको लाईन व्यवस्थापन, लाउण्डस्पीकर, मँच, साधुसन्तको भोजनसम्मको व्यवस्थापन गरिएको मेयर यादवले बताए ।

फागुने औंसीदेखि पुर्णिामासम्म चल्ने परिक्रमा धनुषाको मिथिला विहारी नगरपालिका वडा नम्बर ८ कचुरी मठबाट भगवान राम र जानकीको डोलासहित सुरु हुन्छ ।

परिक्रमामा धनुषा, महोत्तरी र भारत विहारका दर्जनौं धार्मिक ऐतिहासिक ठाँउहरुको ९० किलो मिटर र छिमेकी मुलुक भारतको ३० किलो मिटर गरि जम्मा १ सय २० किलो मिटर भु–भागको यात्रा गरिन्छ ।