अनियमितता विरुद्ध कठोर रुपमा प्रस्तुत हुन्छु : मुख्यमन्त्री गद्दी

न्यूज ब्यूरो ||
जनकपुरधाम, ८ फागुन । प्रदेश नं. २ का मुख्यमन्त्री मो. लालबाबु राउत गद्दीले जनताको काममा ढिलासुस्ती गर्ने उपर कठोर प्रस्तुत हुने बताएका छन् ।

मँगलबार पर्साको जिल्ला प्रशासन कार्यालयका कर्मचारीहरुलाई निर्देशन दिँदै मुख्यमन्त्री गद्दीले जनताको कार्यमा अनियमितता वा ढिलासुस्ती अथवा भ्रष्टाचारको सुईको पाएपनि कठोर प्रस्तुत हुने बताए ।

प्रदेश सरकार गठन भएलगत्तै गद्दीले प्रदेश सरकारले निकट भविष्यमै प्रहरी तथा निजामतीलगायत सातवटा कानून ल्याउने तयारीमा रहेको जनाए ।

'संविधानको मूल कानूनसँग नबाझिने गरी प्रदेश सरकारले कानून निर्माण गर्ने गृहकार्यमा लागेकोे र सक्दो चाँडो कानून निर्माण गरिनेछ' उनले भने ।

कार्यालयका प्रमुखहरुलाई निर्देशन दिँदै उनले – “प्रदेश सरकारले ल्याउन लागेकै कानूनबाट प्रदेशका सबै कर्मचारी नियन्त्रित र निर्देशित हुनेछ ।” भने ।

प्रदेशमा सबैभन्दा ठूलो समस्या नै ढिलासुस्ती र अनियमिता रहेकाले यसलाई सुधार गरी विकास निर्माणका कार्य अगाडी बढाउनेतर्फ प्रदेश सरकार लागिपरेकोे चर्चागर्दै सरकारले लिएको भ्रष्टाचार विरुद्धको शून्य सहनशीलताको नीतिलाई कडाइका साथ लागू गर्ने प्रतिवद्धता जाहेर गरे ।

मुलुकभित्र रहेका प्रशिक्षित, परिस्कृत र अनुभवी राष्ट्रसेवकको सहयोग बिना प्रदेशलाई समृद्ध बनाउन नसकिने बताउँदै उनले प्रदेशको समृद्धिका लागि आ–आफ्नो तर्फबाट शत्प्रतिशत सहयोग गर्न कर्मचारीलाई आग्रह समेत गरे ।

जनताको कामलाई तोकिएको समयभित्र सम्पन्न गरी सेवा प्रवाहलाई गति दिन कार्यालय प्रमुखलाई निर्देशन दिए ।