बालक अपहरण आरोपमा काका सहित दुई जना पक्राउ

न्यूज ब्यूरो, सिरहा । सिरहाबाट बालक अपहरण गरेको आरोपमा सिरहा प्रहरीले दुई जनालाई पक्राउ गरी सार्वजनिक गरेको छ ।

गत माघ २० गते सिरहा नगरपालिका वडा नम्बर १५ सुखचैनाबाट बालक प्रियाँशु यादवको अपहरण र शरिर बन्धक मुद्दाका प्रतिवादीलाई जिल्ला प्रहरी कार्यालय सिरहाले सोमबार सार्वजनिक गरेको हो ।

भारतको इण्डियन काउण्टर पार्टसको सहयोगमा बालक यादवको अपहरणमा सँलग्न आरोपमा बालकको नातामा काका पर्ने बर्ष २३ को कुलदीप यादवलाई पक्राउ गरेको हो ।

यसका साथै, कुलदीप यादवकै योजनामा बर्ष २३ का भरोसी यादवले बालक अपहरण गरेको आरोपमा उनलाई पनि पक्राउ गरेको हो । कुलदीप यादव र भरोसी यादवलाई सोमबार सार्वजनिक गरेको छ ।

नातामा बालकको काका पर्ने कुलदीपको योजना अनुसार भरोसी यादवले बच्चा उठाई भारतको पचहर भन्ने स्थानमा लगी राखेको थियो । उनलाई भारतको खाजेडिहबाट उद्धार गरी बालककी आमा सँजीता देवी यादवलाई जिम्मा लगाएको हो ।

यादवद्धयलाई पक्राउ गरी जिल्ला अदालत सिरहाबाट अपहरण तथा शरिर बन्धक मुद्दामा ७ दिनको म्याद थप गरी अन्य अनुसन्धान कार्य भईरहेको प्रहरीले जनाएको छ ।