प्रदेश २ मा मन्त्रीमण्डल विस्तार हुँदै, को को बन्दैछ मन्त्री ?

न्यूज ब्यूरो ||
जनकपुरधाम, ५ फागुन । प्रदेश नम्बर २ को मन्त्रीमण्डल भोली बिस्तार हुने भएको छ ।

गत विहिबार गठन भएको मन्त्रीमण्डलमा संघिय समाजवादी फोरम नेपालका २ जना मन्त्री र ३ जना राज्यमन्त्री थपिने छ ।

मुख्यमन्त्री मो.लालबाबु राउत गद्दीले मन्त्रीमण्डल चाँडै विस्तार हुने संकेत गरे ।

हाल मुख्यमन्त्री मो।राउत र फोरमको तर्फबाट आर्थिक मामिला मन्त्री विजय यादव र राजपाको तर्फबाट भौतिक निर्माण मन्त्री जितेन्द्र सोनल छन् ।

फोरम प्रदेश समितिको शुक्रवार बसेको बैठकले मन्त्रीहरुको नाम टुंगो लगाएको छ ।

उच्च स्रोतहरुका अनुसार आन्तरिक मामिला तथा कानुन मन्त्रीमा ज्ञानेन्द्र यादव र कृषि मन्त्रीमा शैलेन्द्र साहलाई पठाउने बैठकले निर्णय गरेको छ ।

राज्यमन्त्रीहरुमा रौतहटका योगेन्द्र यादव, महोत्तरीका कोशल यादवको नाम अगाडी छ ।

बैठकको निर्णय सार्वजनिक गरिएको छैन् । बैठकमा अध्यक्ष उपेन्द्र यादव, उपाध्यक्ष श्रीमती रेनु यादव, मुख्यमन्त्री लालबाबु , महासचिव रामसहाय यादव, प्रदेश महासचिव शम्भु झा, सचिव शेषनारायण यादव लगायतको सहभागिता थियो ।

बैठकले निर्णय गरे अनुसारका साँसदहरुलाई मन्त्रीको सपथ गराईने बताइएको छ ।‘मन्त्री छनौटको जिम्मेवारी अध्यक्षलाई छ ’मुख्यमन्त्री राउतले भने, पार्टीका सबै साँसदहरु योग्य र क्षमतावान छन्, छनौट गर्ने जिम्मेवारी अध्यक्षलाई छ ’।

अगामी हप्ता मुख्यमन्त्रीले संसदबाट विश्वासको मत प्राप्त गर्नेछन् । अध्यक्ष यादव र उपाध्यक्ष श्रीमती यादव सप्तरी गएका छन् ।महासचिव रामसहाय , प्रदेश महासचिव झा लगायतका नेता यहाँ छन् ।

राष्ट्रिय जनता पार्टी ९राजपा० नेपालमा मन्त्री चयन, संसदीय दलको नेता चयन लगायतका विषयमा गंभीर विवाद उत्पन्न भएको छ ।राजपाले नाम दिएपछि फेरी सरकार विस्तार हुने फोरम नेताहरुले जनाए ।

राजपाले के गर्छ, त्यो उसको काम हो’ फोरम अध्यक्ष यादवले भने, हामीले आफ्नो कार्यलाई अगाडी बढाउछौ ।’ राजपाले सरकारमा संसदीय दलका नेता जितेन्द्र सोनललाई पठाएको छ ।हाल उनी राजपाको भागमा परेका सबै मन्त्रालयहरुको जिम्मेवारी सम्हालेका छन् ।

तर पार्टीमा असन्तुष्टि बढेको कारण थप मन्त्रीहरुको चयनमा केहि समय लाग्ने संभावना छ ।पार्टीमा अध्यक्ष मण्डलका संयोजक महन्थ ठाकुरले हैकम चलाएको आरोप अध्यक्ष मण्डलका सदस्यहरुले लगाएका छन् ।

उनले मन्त्रीमा सोनल र राज्यमन्त्रीमा परमेश्वर साहको नाम सिफारिस गरेका थिए ।तर साहलाई सपथग्रहण गराईएन् ।ठाकुरको एकल निर्णय गर्ने प्रवृतीप्रति असन्तुष्टि जनाउँदै अध्यक्ष मण्डलका ५ जना सदस्यहरु राजधानीमा आएका छैनन् ।राजपाका २५ जना साँसदहरु छन् ।

ती मध्ये झण्डै डेढ दर्जन साँसदहरु संयोजक ठाकुरका बिरोधमा छन् भनेर आजको जनकपुर टुडेमा समाचार छ ।