प्रदेश २ः माइन्यूटमा नक्कली साईन गरेको आरोपमा हाकिम सहित ३ सरकारी कर्मचारी पक्राउ

न्यूज ब्यूरो, बारा । प्रदेश नम्बर २ को एक जिल्लाबाट ३ जना सरकारी कर्मचारीलाई प्रहरीले पक्राउ गरेको छ ।

प्रदेश २ को बाराको सिम्रौनगढ नगरपालिकामा जाली (नक्कली) हस्ताक्षर (साईन) गरी जनप्रतिनीधिलाई सघाएको आरोपमा नगरपालिकाका हाकीम सहित ३ जना कर्मचारीलाई प्रहरीले आईतबार पक्राउ गरेको हो ।

नगर प्रमुख (मेयर)सँग मिलेर माइन्युटमा किर्ते (नक्कली) हस्ताक्षर गरेको आरोपमा प्रहरीले नगरपालिकाका प्रमुख प्रशासकीय अधिकृत, योजना शाखा अधिकृत र लेखा अधिकृतलाई पक्राउ गरेको बारा प्रहरीले जनाएको छ ।

सिम्रौनगढ नगरपालिकाको गत असार २६ गते भएको नगरसभाको माइन्यूटमा किर्ते हस्ताक्षर गराएर नगरप्रमुख विजयशंकर यादवलाई सघाएको आरोपमा प्रहरीले तीनै जनालाई आईतबार पक्राउ गरिएको जिल्ला प्रहरी कार्यालय बाराका प्रवक्ता प्रहरी नायव उपरीक्षक गौतम मिश्रले जानकारी दिए ।

प्रहरीले नगरपालिकाको प्रमुख प्रशासकीय अधिकृत अरिओम प्रसाद जयसवाल, योजना शाखाका कर्मचारी जितेन्द्र यादव र लेखा अधिकृत सर्वेन्द्र चौधरीलाई पक्राउ गरिएको हो । लेखा अधिकृत र योजनाका कर्मचारीलाई ३ दिन अघि नै नियन्त्रणमा लिएको थियो भने प्रमुख प्रशासकिय अधिकृत हरिओम प्रसाद जयसवाल आइतबार स्वयं हाजिर भएका छन् ।

नगरप्रमुख यादव किर्ते हस्ताक्षर गराई नगरसभा सम्पन्न गरेपछि उपप्रमुख रिमा देवीको नेतृत्वमा नगर कार्यपालिकाका १७ जना सदस्यहरुले जिल्ला अदालत बारामा मुद्दा दिएका थिए । मुद्दा परेपछि नगरप्रमुख यादव हाजिर भएर तारिखमा छुटेको उपप्रमुख यादवले जानकारी दिइन् ।

उनले भनिन्, ‘नगरप्रमुखले नगरसभामा मनोमानी गरेपछि हामीले बिरोध गर्यौँ, बिरोधपछि उनले कर्मचारीहरुसँग मिलेर किर्ते हस्ताक्षर गराई नगरसभा सम्पन्न गरे । किर्ते हस्ताक्षर गरेर नगरसभा सम्पन्न भएपछि हामी अदालत समक्ष पुग्यौँ ।’

मुद्दाको अनुसन्धानका लागि उनलाई नियन्त्रणमा लिइ थप अनुसन्धान जारी रहेको जिल्ला प्रहरी कार्यालय बाराले जनाएको छ । किर्ते र जाली हस्ताक्षर अदालतमा ठहर साबित भए तिनै जना कर्मचारीलाई कारवाही हुन सक्छ ।