जसपाका अर्का चर्चित नेता ओली समूहमा प्रवेश

न्यूज ब्यूरो, जनकपुरधाम । जनता समाजवादी पार्टी (जसपा) का एक अर्का नेता पनि नेकपाको केपी ओली समूहमा प्रवेश गरेका छन् ।

जनता समाजवादी पार्टीका केन्द्रीय सदस्य इस्लाम हवारी केपी ओली नेतृत्वको नेपाल कम्युनिष्ट पार्टी (नेकपा) मा प्रवेश गरेका हुन् । शुक्रबार उनलाई प्रधानमन्त्री केपी शर्मा ओलीले पार्टीमा स्वागत गरेका हुन् ।

प्रधानमन्त्री निवास बालुवाटारमा शुक्रबार बिहान आयोजित विशेष कार्यक्रममा हवारीलाई नेकपामा स्वागत गरी नेकपामा भित्र्याएका छन् । प्रदेश नम्बर २ को पर्सा वीरगँज बस्ने नेता हवारीले ओली खेमामा प्रवेश गरेका हुन् ।

स्वागतका क्रममा प्रधानमन्त्री ओलीले हवारीलाई उत्कृष्ट ढंगले पार्टी काम गर्न शुभकामनासमेत दिए। वीरगञ्ज निवासी हवारीसँगै जसपाका विभिन्न तहका नेता कार्यकर्ताहरु पनि पार्टी प्रवेशका क्रममा रहेको जानकारी कार्यक्रममा दिइएको थियो।

मुस्लिम विभागका इन्चार्ज एवं संविधानसभा सदस्य समेत रहेका इस्लाम हवारी जसपाबाट ओलीसँग गएपछि जसपाकै नेताहरुमा अलमलता हुन थालेको देखिएको छ । विभिन्न समयमा जसपाले आफ्नो कोही पनि र आफू कुनै अन्य पार्टीमा नजाने ठोकुवा गरेपछि विस्तारै भित्रैभित्र जसपाका चर्चित नेताहरु पार्टी छाडेका छन् ।

यसअघि महोत्तरीका शिवजी यादव पनि जसपालाई छाडेर केपी ओलीको समूहमा प्रवेश गरिसकेका छन् । विभिन्न सँचारमाध्यमहरुमा जसपाका राजकिशोर यादव, उमा शंकर अरगरिया लगायतका अन्य नेताहरु पनि नेकपामा जाने तयारी गरेको खवरहरु आएको छ ।

यद्यपी, ती नेताहरुले आफू अन्य कुनै पनि पार्टीमा नजाने भनेर दाबी गर्दै आएका छन् । हवारीलाई प्रचण्ड पक्षधरबाट ओली खेमामा गएका नव नियुक्त शहरी विकास मन्त्री प्रभू साहले प्रवेश गराएको बुझिएको छ ।