धनुषाः कुखुरा फार्ममा आगो लगाइदिएपछि लाखौंको चल्ला नष्ट

न्यूज ब्यूरो, जनकपुरधाम । धनुषाको महेन्द्रनगर स्थित रहेको एक कुखुरा फार्ममा गएराती आगलगी हुँदा लाखौंको चल्ला जलेर नष्ट भएको छ ।

धनुषाको क्षीरेश्वरनाथ नगरपालिका वडा नं. ५ महेन्द्रनगर स्थित रहेको शनि फिड तथा कुखुरा सप्लायर्स प्रा.लि. मा गएराती कसैले आगो लगाइदिँदा लाखौंको चल्ला नष्ट भएको जनाइएको छ ।

शुक्रबार राती करिब ११ र १२ को बीचमा कसैले आगो लगाएर भागेको फार्म सँचालक अमित कुमार मण्डलले जानकारी दिए । मण्डलका अनुसार, रातीमा आफूहरु सुतिरहँदा अचानक भएको आगलगीमा परेर सबै चल्ला नष्ट भएको हो ।

फाराम भित्र ७ दिने २००० चल्ला राखिएको थियो । क्षीरेश्वरनाथ नगरपालिका वडा नं. ४ को पश्चिमपट्टि रहेको सो फाराममा कसैले आगो लगाइदिएको अनुमान सँचालकको रहेको छ । यद्यपी, यसबारे प्रहरीले भने अहिले मुचुल्कापछि अनुसन्धानपछि मात्र भन्न सकिने जनाएको छ ।

सँचालक मण्डलका अनुसार त्यसमा रहेको चल्ला, कुखुरा सहित पोल्ट्री फार्मको सर समान र घर गरी करिब १५ लाख रुपैयाँ बराबरको क्षति भएको हो । अहिले ईलाका प्रहरी कार्यालय महेन्द्रनगरको टोली घटनास्थल पुगेको छ ।