प्रदेश २ः करेन्ट लागेर हातीको मृत्यु, अन्तिम सँस्कार गरि विदाई गरिने

न्यूज ब्यूरो, राजविराज । प्रदेश नम्बर २ को सप्तरीमा एक जँगली हातीको करेन्ट लागेर मृत्यू भएको छ । हिन्दु धर्मावलम्बीहरुको लागि ईश्वरमुखी मानिएको हातीलाई करेन्ट लागेर मृत्यू भएको हो ।

सप्तरीको खडक नगरपालिका–४ अमहामा शनिबार (आज) बिहान करेन्ट लागेर एउटा हात्तीको ज्यान गएको छ । दैनिकरुपमा हात्ती आउने गरेकाले रातिको समयमा स्थानीयले हात्ती धपाउनका लागि बिछ्याइएको विद्युतीय तारमा विद्युत् प्रवाह भई भाले हात्तीको मृत्यु भएको डिभिजन वन कार्यालय सप्तरीका रेन्जर लक्ष्मण साफीले जानकारी दिए ।

कोशी टप्पु वन्यजन्तु आरक्षबाट आएको हात्ती खडक नगरपालिकाको बस्तीमा पस्ने क्रममा करेन्ट लागेर मृत्यु भएको इलाका प्रहरी कार्यालय कडरबोनाका प्रहरी निरीक्षक वीरेन्द्र पासवानले जानकारी दिए ।

हात्तीको मृत्युको घटनाबारे बुझ्न शनिबार बिहान कोशी टप्पु वन्यजन्तु आरक्षबाट एक टोली त्यहाँ पुगेर मुचुल्का उठाउने डिभिजन वन कार्यालय सप्तरीका रेन्जर साफीले बताए ।

कोशी टप्पु वन्यजन्तु आरक्षबाट दैनिक आउने हात्तीका कारण सो क्षेत्रका बासिन्दा रातभर जाग्राम बस्नुपर्ने बाध्यता छ । सो क्षेत्र मात्र नभई जिल्लाको पश्चिमी, उत्तरी र पूर्व भेगमा समेत कोशी टप्पु वन्यजन्तु आरक्षबाट निस्कने हात्तीका कारण दैनिक आतङ्क हुने गर्दछ ।

करेन्ट लागेर हातीको मृत्यू भएपछि हातीलाई हिन्दु परम्परा अनुसार अन्तिम श्रद्धाञ्जली दिँदै विदाई गरिने स्थानीयहरुले बताएका छन् ।