एउटा यस्तो बस्ती : जहाँ अझसम्म थिएन राज्यको उपस्थिति

बिनय यादव, सिरहा । सिंगो गाउँ उल्लासमय छ । गाउँका सर्वसाधारणहरुको मुहारमा उमंग छ । तर, गाउँमा कुनै मेला छैन । विहे वा अन्य रमाइलो गर्ने कार्यक्रम पनि छैन । तर, गाजाबाजा धन्किरहेको छ । देशभक्तिका गीत बज्दैछ । बच्चादेखि वृद्धसम्म हर्षित छन् ।

यस गाउँका नागरिकमा देखिएको यो खुशी, उल्लास र उमंगको एउटै कारण छ, गाउँमा राज्यको उपस्थिति । बुधबार देखिएको यो दृश्य हो, सिरहाको कल्याणपुर नगरपालिका–९, रुदलपुरको ।

देशमा थुप्रा संघर्षहरु भए, व्यवस्था फेरिए । तर, यस गाउँका नागरिक भने हालसम्म कुनै परिवर्तन अनुभूत गर्न पाएका छैनन् । पहिला जस्तो अवस्था थियो, अहिले पनि उस्तै नै छ ।

मलाह समुदायको बाहुल्यता रहेको यो बस्तीमा करिब २० वटा जति घरपरिवार छन्, ५० बढी मतदाता छन् । मुलुकमा भएका परिवर्तनका संघर्षहरु र अर्थतन्त्रमा उनीहरुको पनि योगदान छ । तर, यहाँ अहिलेसम्म सरकारी एक सुकोको पनि काम भएको छैन ।

राज्यको उपस्थितिको आशमा बसिरहेको उनीहरुको मुहारमा आज देखिएको हर्ष स्वाभाविक नै थियो । सबैका लागि नहोला, तर यहाँका बासिन्दाका लागि आजको दिन खास नै थियो । यहाँ पहिलो पटक सरकारी बजेटको काम हुने भएको छ ।

प्रदेश सरकारको उद्योग, पर्यटन, वन तथा वातावरण मन्त्रालयको बजेटमा यहाँ सामुदायिक भवन निर्माण हुने भएको हो । रामजानकी धर्मशाला नाम दिइएको यो भवन निर्माणका लागि बुधबार राज्यमन्त्री सुरेश कुमार मण्डलले शिलान्यास गरेका छन् ।

मन्त्रालयको १५ लाख लागतमा बन्न लागेको यो भवन निर्माणको काम यससँगै थालिने भएको छ । धर्मशालाका लागि औरहीका एकजना जमिन्दारले १ कठ्ठा जग्गा दान गरेका छन् । राम्रो काम हुन लागेको हेर्दा जग्गा दान गरेको जग्गा दाताका नाती तथा जसपा निकट विद्यार्थी संगठनका केन्द्रीय सदस्यसमेत रहेका संतोष यादवले बताए ।

राज्यमन्त्री मण्डलले अहिलेसम्म पनि यो बस्तीमा सरकारी बजेटको काम नहुनु दुःखद भएको बताए । यहाँका नागरिकले पनि राज्य र सरकारको अनुभूति गर्न पाओस् भनेर आफूले यसका लागि योजना व्यवस्थापन गरेको उनले बताए । यो पहिलोपटक भएको बताउँदै उनले क्रमशः थप काम गर्दै जाने पनि जनाए ।

सानो बस्ती र दलित समुदाय भएकै कारण आफूहरुमाथि कसैको नजर नपरेको र आफूहरु वहिष्करणमा परेको स्थानीय मुनेश्वरी देवि मलाहको गुनासो छ । आफूहरुका लागि लिएको चिन्ता र गम्भीरताका लागि राज्यमन्त्री मण्डलप्रति उनले आभारसमेत प्रकट गरिन् ।

यस्तै, यही वडाको सिमरटोकी गाउँमा शिव मन्दिरको शिलान्यास भएको छ । उद्योग, पर्यटन, वन तथा वातावरण मन्त्रालयको २० लाखको बजेटमा निर्माण हुन लागेको यो मन्दिरको शिलान्यास पनि राज्यमन्त्री मण्डलले आजै गरेका छन् ।