जल संरक्षण सँकल्प सहित कमला नदीमा महाकमला आरती सम्पन्न

न्यूज ब्यूरो, जनकपुरधाम । धनुषाको शहिदनगर नगरपालिकाका मेयर उदय कुमार बरबरिया (यादव) को सँकल्पित महाकमला आरतीको बुधबार दोस्रो आरती सम्पन्न गरिएको छ ।

मेयर बरबरियाले सँकल्प गरेको कमला बचाउ अभियान तहतको कमला आरतीको आज पूर्णिमाका दिन दोस्रो आरती सम्पन्न गरिएको हो । कार्तिक पूर्णिमादेखि विधिवत रुपमा प्रारम्भ गरिएको कमला आरती प्रत्येक महिनाको पूर्णिमाको दिन आरती आयोजना गरिने भएको छ ।

सो क्रममा कमला स्नान, जल संरक्षण सँकल्प गर्दै महाकमला आरतीको प्रारभ्म गरिएको हो । जल सहित पर्यावरण बचाउने हेतु आरम्भ गरिएको कमला बचाउ अभियानको कमला आरती प्रत्येक महिना पूर्णिमाका दिन साधुसन्तहरुको उपस्थितिमा नियमित हुने अभियानका सँयोजक विक्रम यादवले बताए ।

धार्मिक एवम् ऐतिहासिक महत्व रहेको कमला नदिको कुम्भ रामघाटमा दिव्य महाकमला आरती सम्पन्न भएको सँयोजक यादवले जनाए । मानव सभ्यताको लागी प्रकृति संस्कृति वा कमला नदी संरक्षणको मुख्य उद्देश्यको साथ आयोजित महाआरतीमा स्थानीय पण्डित , कमला अभियानी विरेन्द्र यादव, श्याम कुमार महतो लगायत कमला नदि किनारमा बस्ने साधुसन्तहरुको उपस्थितिमा आरती सम्पन्न गरिएको हो ।

कमला बचाउ अभियानका अभियानी समेत रहेका मेयर बरबरियाले यसअघि देखि नै कमला नदीको अस्तित्व संरक्षणको लागि कमला आरतीको आयोजन गरिने उदघोष गरेका थिए ।