प्रदेश २ः नक्कली तेल बेच्ने उद्योगमा छापामारी, लाखौंको तेल बरामद

न्यूज ब्यूरो, वीरगँज । प्रदेश नं. २ को आर्थिक नगरी भनिने वीरगँजमा एक तेल उद्योगमा छापामारी गर्दा लाखौंको तेल बरामद गरिएको छ ।

जिल्ला प्रहरी कार्यालय पर्साले वीरगञ्जमा नक्कली तेल बेचेको सूचनाको आधारमा गरिएको छापामारीको क्रममा लाखौं मूल्य बराबरको तेल बरामद गरेको हो । त्यहाँबाट सँचालनमा रहेको तेलेको दुई घरेलु उद्योगमा छापामारी गरेर लाखौँ बराबरको सोयाबिनको तेल बरामद गरेको हो ।

वीरगञ्ज महानगरपालिका वडा नम्बर ३ को आदर्श टोलमा सञ्चालित त्रिदेव रिप्याकेजिङ्ग उद्योग र शिवशक्ति रिप्याकेजिङ्ग उद्योगमा छापामारी गरेर लाखौँ मूल्य बराबरको सोयाबिन तेल बरामद गरेको हो ।

दुवै उद्योगले सोयाबिन तेललाई तिलको तेलको डब्बामा रिप्याकेजिङ्ग गरेर बजारमा थोक मात्रामा बेच्दै आएका थिए । भारतबाट ठूलो मात्रामा सोयाबिनको तेल आयात गरेर दुवै उद्योगले त्यसलाई रिप्याकेजिङ्ग गरेर तिलको तेलको डब्बामा राखेर बजारमा बेच्दै आएको जिल्ला प्रहरी कार्यालय पर्साले जनाएको छ ।

उद्योगहरुले विभिन्न ब्राण्डको नाम दिएर पूजापाठका लागि विशेष गरेर प्रयोग हुने तिलको सट्टा सोयाबिन तेल बजारमा पठाएर बेच्दै आएको प्रहरी अनुसन्धानको क्रममा पाइएको छ । उनीहरुले उपभोक्ताको धार्मिक आस्थामाथि समेत चोट पुर्‍याएको प्रहरीलाई उदृत गर्दै यात्राडेलीले समाचार प्रकाशित गरेको हो ।

यसरी सोयाबिनको तेललाई तिलको तेल भनेर बेच्दा उनीहरुले उपभोक्ताबाट प्रति लिटर ७० देखि ८० रुपैयाँसम्म ठग्ने गरेको जिल्ला प्रहरी कार्यालयका प्रवक्ता एवम् प्रहरी नायव उपरीक्षक मनोजित कुँवरले बताए ।

पर्साकी प्रहरी उपरीक्षक गङ्गा पन्तको नेतृत्वमा जिल्ला प्रहरी कार्यालय पर्सा र वडा प्रहरी कार्यालय विर्ताले संयुक्त रुपमा छापामारी गरेर त्रीदेव रिप्याकेजिङ्ग उद्योगबाट ४ हजार ४ सय ५५ लिटर र शिवशक्ति रिप्याकेजिङ्ग उद्योगबाट ८ सय ६० लिटर सोयाविनको तेल बरामद गरेको छ । तेलको बजार मूल्य ७ लाख ५८ हजारभन्दा माथि रहेको डीएसपी कुँवरले जानकारी दिए ।

प्रहरीले दुवै उद्योगका सञ्चालकलाई पनि पक्राउ गरेको छ । कालोबजारी र उपभोक्ता ठगेको आरोपमा प्रहरीले त्रिदेव रिप्याकेजिङ्ग उद्योगका सञ्चालक राजन कुमार बरनवाल र शिवशक्ति रिप्याकेजिङ्ग उद्योगका सञ्चालक दिपक कुमार बरनवाललाई पक्राउ गरेको कुँवरले बताए ।

उनीहरुलाई हिरासतमा थप अनुसन्धान गरी कालोबजारी मुद्दा वडा प्रहरी कार्यालय विर्ताका प्रहरी निरीक्षक राजेशराज पुरीले जानकारी दिए ।