जसपाले जनकपुर सहित प्रदेशभरि मशाल बाले

न्यूज ब्यूरो, जनकपुरधाम । जनता समाजवादी पार्टी नेपाल (जसपा) ले आज प्रदेश नं. २ को अस्थायी राजधानी जनकपुर सहित प्रदेशभरि नै मशाल जुलुस प्रदर्शन गरेको छ ।

जनता समाजवादी पार्टी नेपालको पूर्व घोषित कार्यक्रम अनुसार, जनकपुर सहित प्रदेशभरि मशाल बालेको हो । प्रधानमन्त्री ओलीले सँसद विघटन गरेपछि त्यसको विरोध गर्दै जसपाका नेता तथा कार्यकर्ताहरु विरोध प्रदर्शन गर्दै आएको छ ।

जसपाको चरणवद्ध आन्दोलनको स्वरुप शनिबार साँझ मशाल जुलुस प्रदर्शन गरिएको हो । जसपाका जिल्लास्तरीय देखि प्रदेशस्तरीय नेताहरु सहित कार्यकर्ताहरुले मशाल बालेका हुन् ।

यसका साथै, प्रदेशको धनुषा सहित महोत्तरी, सर्लाही, सप्तरी, सिरहा, रौतहट र बारामा पनि मशाल जुलुस प्रदर्शन गरेको हो ।

धनुषाधाममा पनि मशाल बालिए

सोही क्रममा धनुषाको धनुषाधाममा पनि मशाल जुलुस प्रदर्शन गरिएको छ ।

जसपाका पार्टी नगर संयोजक बिनोद यादवको नेतृत्ववमा ऐतिहासिक धनुषाधाम बजारमा मशाल जुलुस प्रदर्शन गरिएको हो ।

मध्यावधि ल्याएको बिरोधमा पूर्व निर्धारित समय अनुसार जनता समाजवादी पार्टी धनुषाधाम नगर संयोजक बिनोद यादवको अगुवाईमा पूर्व सांसद तथा जसपा केन्द्रिय सद्स्य ममता यादवको विशेष उपस्थितिमा मशाल जुलुस प्रदर्शन गरिएको हो ।

सभापति गर्दै यादवले कम्यूनिष्ट सरकार देशलाई डुबाउन खोजेको आरोप लगाउँदै अब देशको पहिलो पार्टी जनता समाजवादी नेपाल हुने जीकिर गरे ।

सोही क्रममा पूर्व साँसद ममता यादवले देशमा कोरोना महमारीको बेला देशसँग भ्याक्सीनको लागि पैसा नभएको बताइरहँदा चुनाव गराउन पैसा कहाँबाट ल्याउने भन्दै प्रश्न तेर्साइन् ।

उनले बदमासहरुको हातमा देश गएको अवस्थामा अब यसलाई ठिक गर्न जनता समावादी पार्टी देश व्यापी बिरोध जारी राख्ने बताइन् ।

मशाल जुलुस धनुषाधाम मुख्य बजार परिक्रमा गर्दै धनुष मन्दिर स्थित चौतारामा कोण सभा गरिएको थियो।

कार्यक्रममा क्षेत्रीय सचिव बेचन महतो,जसपा नेता जितन राई, चन्दन नरायाण यादव,शिवनाथ यादव,गगन साह, नगर युवा अध्यक्ष प्रदिप भण्डारी लगायत नगरका युवाहरुको व्यापक सहभागितामा रहेको थियो ।