जनकपुरमा २१ जोडी वरवधुको सामुहिक विवाह हुने, आज १०८ कन्या पूजिने

न्यूज ब्यूरो, जनकपुरधाम । विश्व हिन्दू परिषद् नेपाल जिल्ला कार्य समिति धनुषाले गत वर्ष झै यस बर्ष पनि अलौकिक कन्या पूजन कार्यक्रम तथा सामूहिक विवाह समारोह आयोजना गर्ने निर्णय गरेको छ ।

जनकपुरधाम स्थित जानकी मन्दिरको प्रांगणमा विहिबार (आज) कन्या पूजन कार्यक्रम राखिएको छ भने पुस ५ गते आईतबार सामूहिक विवाह समारोह आयोजना गर्न लागेको हो ।

परिषदले कोरोना महामारीको प्रकोपलाई मध्यनजर गर्दै यस बर्ष १०८ कन्याको सहभागितामा अलौकिक कन्या पूजन कार्यक्रम र २१ जोडी बर बधुको सहभागितामा सामूहिक विवाह समारोह आयोजना गरिने तय गरेको छ ।

विश्व हिन्दु परिषद् नेपालको आयोजना तथा व्यवस्थापनमा आयोजना हुने कन्या पूजन कार्यक्रम तथा सामूहिक विवाह समारोहको मुख्य उद्देश्य समाजमा ब्याप्त महिला हिँसा, भ्रुण हत्या एवं दाईजो प्रथा जस्ता कुरितीहरु उन्मूलन गरी समरस एवं सभ्य समाज निर्माण गर्नु रहेको छ ।

राष्ट्र, धर्म र समाजहीतका लागि विश्व हिन्दू परिषद नेपालले आगामी दिनहरुमा समेत यस्ता कार्यक्रमहरुलाई निरन्तरता दिइने जनाइएको छ । गत वर्षपनि सामुहिक विवाहको आयोजना गरिएको थियो ।