सिरहा सदरमुकाममा सुशासनको माग, बेवास्ता भए आन्दोलनको चेतावनी

न्यूज ब्यूरो सिरहा । नेपाल कम्युनिष्ट पार्टी ९नेकपा० सिरहा नगर समितिले सिरहा सदरमुकाममा सुशासन कार्यान्वयनमा ल्याउन माग गरेको छ ।

नेकपा सिरहाले शुक्रबार पत्रकार सम्मेलन आयोजना गरी कर्मचारीहरुकै कारण सुशासनको अवस्था धारासायी बनेको भन्दै यस्तो माग गरेको हो ।

सरकारी अड्डाहरुमा अनावश्यक रुपमा जनतालाई दुस्ख दुने, घुस विना काम नगर्ने तथा खुलेआम भ्रष्टाचार जन्य अवैध काम भइरहेको र नियामक निकाय मौन बसेको नेकपाका स्थानीय नेताहरुको आरोप छ । यसकै कारण सरकारको पनि बदनामी भइरहेको ठहर उनीहरूको छ ।

पटकपटक यसका लागि आवाज उठाएपनि र यस विषयमा स्थानीय तहसहित सम्बन्धित निकायहरुमा ध्यानाकर्षण गराएपनि वास्ता नभएको प्रदेश सांसद प्रमोद यादवले गुनासो गरे । प्रमुख जिल्ला अधिकारी समक्ष अवस्था सुधारका लागि पटकपटक गुहार लगाएपनि उनीसमेत उदासीन देखिएको उनको भनाइ छ ।

सरोकारबाला निकायकै मिलेमतो र संरक्षणमा लुट मच्चाउने काम भइरहेको उनको आरोप छ । सिरहा सदरमुकामभित्र पारदर्शिता र सुशासनसँग सम्बन्धित विभिन्न १६ बुँदे माग राखी उनीहरूले पुनः आज प्रमुख जिल्ला अधिकारीलाई ज्ञापन पत्रसमेत बुझाएका छन् ।

विभिन्न सरकारी निकायलाई बोधार्थ राखी बुझाइएको ज्ञापन पत्रमा उल्लेखित बुँदाहरु ७ दिनभित्र कार्यान्वयनमा ल्याउन अल्टिमेटम दिइएको छ । सात दिनभित्र कार्यान्वयनमा नआए अब चुप नबस्ने चेतावनी पनि उनीहरूको छ ।

ज्ञापन पत्रमा समावेश बुँदाहरु जनहितका भएकाले सम्बन्धित निकायले कार्यान्वयनमा ढिला गर्न नहुने र आलटाल भए चरणवद्ध आन्दोलनमा जाने उनीहरूले चेतावनी दिएका छन् ।

यस्ता छन् माग

जिल्ला अस्पताल सिरहामा निर्माणाधीन भौतिक संरचना निर्माणमा सिरहा नगरपालिका, स्वास्थ्य विकास समिति र अस्पतालका मेसुको आपसी मिलेमतोमा भ्रष्टाचार गर्न खोजिएको भन्दै अविलम्ब काम रोकी पारदर्शी ढंगले काम हुनुपर्ने उनीहरूको माग छ ।

जिल्ला स्वास्थ्य कार्यालयमा इमर्जेन्सीमा चिकित्सक उपस्थित नहुने, भएपनि एकैचोटि रिफर गरिदिने र फोहोर व्यवस्थापनलाई समेत बेवास्ता गर्ने काम भइरहेकाले सुधार गरिनुपर्ने ज्ञापन पत्रमा उल्लेख छ । विकास निर्माणका कामहरू गर्दा होर्डिङ बोर्ड अनिवार्य लगाई पारदर्शी ढंगले काम हुनुपर्ने माग उनीहरूको छ ।

सदरमुकाममा अवस्थित सरकारी बैंकहरुले वास्तविक किसान मजदुरहरुलाई ऋण नदिने, दिँदा पनि घुस लिने र ठूलाबडा पहुँचबालालाई मात्रै चिन्ने गरेको भन्दै सुध्रिन माग गरिएको छ । सिरहा नगरपालिकाले योजना तर्जुमा तथा नगर परिषद् जस्ता कामहरु बन्द कोठामै गरिरहेको भन्दै पारदर्शिता सुशासन कायम गर्न माग उनीहरूको माग छ ।

यस्तै, सिरहा नगरपालिका लगायत यहाँका सम्पूर्ण सरकारी कार्यालयहरुले सार्वजनिक (सर्वदलीय र सर्वपक्षीय) लेखापरीक्षण अविलम्ब मिति तोकी गर्नुपर्ने माग पनि गरिएको छ । कृषि मलखाद्य, विउविजन, सिँचाइ र बजार व्यवस्थापन अविलम्ब गरिनुपर्ने ज्ञापन पत्रमा भनिएको छ ।

कोभिड(१९ नियन्त्रणको नाममा भएका खर्चहरुको शिर्षक अनुसारको लेखाजोखा सार्वजनिक गरिनुपर्ने माग पनि गरिएको छ । शिक्षामा अवैध दरबन्दी मिलान जस्ता मापदण्ड विपरीतका काम भइरहेको भन्दै शिक्षा ऐन नियमावली बमोजिम हुनुपर्ने उनीहरूको माग छ ।

विद्यालयहरुमा समेत आर्थिक अनियमितताका शृंखलाले हद नाघिरहेको भन्दै सार्वजनिक लेखा परीक्षणको माग गरिएको छ । मालपोत, नापी, भूमिसुधार जस्ता व्यस्त सरकारी कार्यालयहरुमा हुने गरेका ढिलासुस्ती, घुसखोरीमाथि निगरानी राखी सुधार गर्न माग गरिएको छ ।

यसैगरी, स्थानीय तहहरुमा करार सेवाका नाममा आसेपासे, नातागोतामा पर्ने व्यक्तिको नियुक्ति तथा आर्थिक चलखेलका काम भइरहेकाले लोकसेवाको माध्यमबाट नै पदपूर्ति गर्न उनीहरूले माग गरेका छन् । सार्वजनिक पोखरी, ताल, झिल, जग्गा लगायतका सम्पत्ति संरक्षणमा समेत सरोकारवाला निकाय उदासीन देखिएको भन्दै गम्भीर हुन आग्रह गरेको छ ।

सिरहा नगरपालिकासँग रहेका सवारीसाधन, जेसीबी, ट्याक्टर लगायतका साधन पारदर्शी ढंगले चल्नुपर्ने, इन्धन तथा मर्मतका काम पनि पारदर्शी ढंगले गरिनुपर्ने उनीहरूको माग छ । नगरपालिकाले खर्च गर्ने इन्धनको विवरणसमेत शिर्षक बमोजिम सार्वजनिक गरिनुपर्ने माग गरिएको छ ।

त्यस्तै, उनीहरूले नगरभित्र रहेका सम्पूर्ण सार्वजनिक तथा ऐलानी पोखरीहरु पनि पारदर्शी ढंगले अनिवार्य ठेक्का लगाउनुपर्ने माग गरेका छन् ।

आफ्नालाई छाँया

उठाइएका मागहरु जनहितका हुन् । सिरहा नगरपालिकाको जम्मा २२ वटा वडामध्ये ६ वटा वडामा नेकपाबाट निर्वाचित वडाध्यक्ष छन् । तर, यी वडाहरुमा पनि पारदर्शिता र सुशासनको अवस्था पादर्शीता र सुशासन भने देखिएको छैनन् ।

सरकारी निकायमा हुने कार्यहरुमा बार्गेनिङ मिल्दा चुप हुने र नमिल्दा मात्रै बोल्ने प्रवृत्ति नौलो होइन । यहाँको अवस्था पनि उस्तै रहेको स्थानीय बताउँछन् । पत्रकार सम्मेलनमा नेकपाका जिल्लादेखि प्रदेशसम्मका नेता उपस्थित थिए । वडाध्यक्षहरु भने उपस्थित थिएनन् ।

तर, त्यहाँ सहभागी नेकपाका नेताहरुले आफ्नो पार्टीबाट निर्वाचित जनप्रतिनिधिहरुको काम कारवाहीप्रति आफूहरू सन्तुष्ट नै रहेको दावी गरे । "हामीले हाम्रा जनप्रतिनिधिमाथि निगरानी राखेका छौं," मेयरका प्रत्यासीसमेत रहेका डा। नवीन यादवले भने, "हामी सन्तुष्ट नै छौं ।"

जनहितका माग उठाउनु प्रशंसा लायक भएपनि रुपान्तरणका लागि सुरुवात भने आफैबाट गरिनुपर्ने पत्रकार देवकुमार यादवको भनाइ छ ।