वर्तमान सरकारको दादागिरी तोडन मैदानमा आउँदैछौं : युवा नेता मण्डल

न्यूज ब्यूरो, सिरहा । नेपाली कांग्रेस निकट तरुण दल सिरहाका सदस्य एवम् युवा नेता अरबिन्द मण्डलले वर्तमान सरकारको दादागिरी तोडन आफूहरु मैदानमा आउने चेतावनी दिएका छन् ।

नेपाली काँग्रेसका वरिष्ठ नेता रामचन्द्र पौडेलमाथि गृहजिल्ला तनहुँमा दुर्व्यवहार भएपछि कांग्रेस निकट तरुणदल सिरहा जिल्ला कार्य समितिले सरकारविरुद्ध कडा प्रदर्शन गर्ने चेतावनी दिएका छन् । यसका साथै उनीहरुले सरकारले यसको परिणाम भोग्नुपर्ने चेतावनी दिएको हो ।

कांग्रेसका भातृ संगठन नेपाल तरुण दल, नेविसंघ लगायतले कम्युनिस्ट प्रधानमन्त्री केपी शर्मा ओली नेतृत्वको सरकारविरुद्ध प्रदर्शन शुरू गरिसकेका छन् भने सिरहामा आज तरुण दलले सिरहाको विभिन्न स्थान तताउने भएको छ ।

नेपाल तरुण दलले देशभरका जिल्ला समितिलाई परिपत्र गर्दै सशक्त विरोध गर्न निर्देशन दिइसकेको छ । नेता पौडेलमाथि भएको दुर्व्यवहार घटनाबारे मिडिया न्युज ब्यूरो सङ्ग संक्षिप्त प्रतिक्रिया दिँदै सिरहा तरुण दलका जिल्ला सदस्य अरबिन्द मण्डलले कम्युनिस्ट सरकारको दादागिरी तोड्न तरुण दल मैदानमा आउने बताएका छन् ।

‘कोरोना भाइरस संक्रमणको महामारीका कारण भौतिक सहभागितायुक्त आन्दोलनहरू कांग्रेसले गर्न सकेको थिएन । तर अब कम्युनिस्टको दादागिरी नै अति भएपछि कोरोनालाई बिर्साएदिएको छ,’ सदस्य मण्डलले भने, ‘अब कांग्रेस र तरुण दल चुप लागेर बस्ने अवस्थामा छैन । देशभरका तरुण कार्यकर्ता प्रतिरोधमा उत्रिएका छन् ।’

तनहुँको ब्यास नगरपालिकामा बनेको पुल उ्दघाटन गर्दै क्रममा प्रहरीले उनलाई पक्राउ गरेको थियो । चौतर्फी विरोधपछि बुधवार साँझ पौडेललाई प्रहरीले रिहा गरिसकेको छ ।