जसपाका नगर युवा सदस्य 'यादव' पार्टीबाट निकालिए

न्यूज ब्यूरो, जनकपुरधाम । धनुषाको धनुषाधाम नगरपालिका वडा नं. ५ नौयसविघा स्थितको समुदायिक विद्यालयमा तोडफोड गर्ने प्रकरणमा मुछिएका जनता समाजवादी पार्टीका नगर युवा सदस्य दिलीप यादवलाई पार्टीबाट निकालिएको छ ।

गत भदौ ३१ गते राती करिब ९ बजेको समयमा मदिरा सेवन गरी मातेका धनुषाधाम नगरपालिका वडा नम्बर ५ नौयसबिघा बस्ने जसपाका नगर युवा सदस्य ३८ बर्षिय दिलीप यादवलाई पार्टीको साधारण सदस्य समेत नरहने गरी निष्कासित गरिएको जसपाका नगर अध्यक्ष विनोद यादवले जानकारी दिए ।

न्यूज ब्यूरोसँगको कुराकानीमा अध्यक्ष यादवले नगरभित्र जसपाको आचरण सुधार सहित सँगठन विस्तार भईरहँदा दिलिप यादवले विभिन्न समयमा स्वार्थीपन, लोभिपन देखाएको भन्दै उनलाई पार्टीबाट निकालिएको बताए । मन्दिरको लागि दिइएको सार्वजनिक चापाकल (कल) आफ्नो घरबारीमा जडान गरी राखेको आरोप यादवमाथि लगाइएको छ ।

पार्टीबाट वा अन्य कुनै ठाउँबाट आउने सार्वजनिक समानहरुको दुरुपयोग गर्ने गरेको आरोप लगाउँदै उनलाई पार्टीबाट निकालिएको हो । गत भदौ ३१ मा सार्वजनिक सम्पति रहेको गाउँको विद्यालयको झयाल रक्सी खाएर तोडफोड गरेको व्यापक आलोचनापछि पार्टीको नगर अध्यक्ष हैसियतले दिलिप यादवलाई निकालिएको प्रतिक्रिया अध्यक्ष यादवको छ ।

धनुषाधाम नगरपालिका वडा नं.५ नौयसबिघामा केही महिना अघि नै निर्माण गरिएको समुदायिक विद्यालयमा दिलिप यादवले झ्याल तोडफोड गरेको थियो ।

यद्यपी, आरोपित दिलीप यादवले भूलवंश झ्याल फुटेको बताएका थिए । उनलाई प्रहरीले पक्राउ गरेको थियो भने स्थानीयस्तरबाट मिलापत्र गरी छुटेको हो ।