धनौजी गाउँपालिकामा कर्मचारीले ताला लगाए, प्रहरीले ताला फोडे

न्यूज ब्यूरो, जनकपुधाम । निरन्तर विवादमा तानिदै आएको धनुषाको धनौजी गाउँपालिकामा कर्मचारीहरुले तालाबन्दी गरेपछि प्रहरीले फोडेको छ ।

नगरपालिकाका स्वास्थ्य शाखाका कर्मचारी सहित अन्य कर्मचारीहरु तथा केही जनप्रतिनीधिहरुले समयमा तलब भत्ता उपलब्ध नगराएको भन्दै तालाबन्दी गरेको थियो । पूर्वघोषित कार्यक्रम अनुसार, दिएको ७ दिने अल्टिमेटम सकिएपनि गाउँपालिकाले कर्मचारीको तलब भत्ता उपलब्ध नगराएर माग पुरा नगरेको भन्दै तालाबन्दी गरेको थियो ।

दिउँसो २ः४७ बजे कर्मचारीहरुले आईतबार तालाबन्दी गरेको थियो भने बेलुकी ६ बजे जिल्ला प्रहरी कार्यालय धनुषाको टोलीले ताला फुटाएको हो । जिल्ला प्रहरी कार्यालय धनुषाका प्रहरी उपरीक्षक (एसपी) रमेश बस्नेतको आदेशमा प्रहरीचौकी धनौजी भडरियाको प्रहरी टोलीले गाउँपालिका अध्यक्ष बद्री सिँहको जानकारीमा ताला फुटाएको हो ।

गत कार्तिक २३ गतेदेखि नै निरन्तर आन्दोलनमा रहँदै आएका कर्मचारीहरुले कोरोना जस्तो सँकटमा आफूहरु दिनरात खटेपनि त्यसको भत्ता भने जनप्रतिनीधिले झ्वाम्म पारेको भन्दै चरणवद्ध आन्दोलनमा उत्रेका हुन् ।

आईतबार नेपाल शिक्षक संघको अध्यक्ष बिजय कुमार मण्डल र धनौजी गाउँपालिकाका स्वास्थ्यकर्मी संघको अध्यक्ष सरोज गिरि सहित गाउँपालिका सचीव सुभाष सिंहको सँयुक्त अध्यक्षतामा कर्मचारीहरुको उपस्थितिमै तालाबन्दी गरिएको थियो ।

शिक्षा ,स्वास्थ्य र प्रशासन सेवा समुहको ज्ञापन पत्रमाथी कुनै सुनवाइ नभएको भन्दै तालाबन्दी गरिएको थियो ।

तालबन्दीको सन्दर्भमा गाउँपालिका अध्यक्ष बद्री सिँहले वडा नम्बर १, ३ र ५ का वडाध्यक्षहरुको गुण्डाशैली र प्रवृतिका कारण गाउँ परिषद अझै हुन नसकेको आरोप लगाए । गाउँ परिषद नै नहुँदा कर्मचारीलाई तलब भत्ता खुवाउन कठिनाई भएको भन्दै उनले सबै वडालाई सहयोग गर्न आग्रह गरे । सोही क्रममा उनले गाउँपालिका उपाध्यक्षलाई पागलको सँज्ञा दिए ।

धनौजी गाउँपालिकाका आम नागरिकहरु जनप्रतिनीधिहरुबाट आजित भएका छन् । उनीहरुले समयमै बजेट नल्याएर हैकमवादी प्रवृति दर्साएको आरोप लगाउँदै एक साताभित्रै परिषद नगरे कडा रुपमा प्रस्तुत हुने चेतावनी दिएका छन् ।