एसिड पीडित आरती साहलाई मधेश सरकारले १० लाख दिनुपर्छ : डा. बिनय पँजीयार

न्यूज ब्यूरो, जनकपुरधाम । डाक्टर्स जनमत एशोसिएशनका प्रवक्ता डा. बिनय पँजीयारले एसिड पीडित आरती साहलाई प्रदेश सरकारले तत्कालै राहत प्रदान गर्नुपर्ने माग गरेका छन् ।

घरायसी झगडामा परी श्रीमानले जनकपुरधाम उपमहानगरपालिका वडा नम्बर २० देवपुरा रुपैठा बस्ने तथा हाल जनकपुरको पेठिया बजार बस्ने आरती साह र उनकी छोरी उपर एसिड प्रहार गरेपछि डा. पँजीयारले आरतीलाई पनि सहयोग गर्न माग गरेका छन् ।

उनले पीडित आरतीलाई प्रदेश सरकारको तर्फबाट राहत स्वरुप १० लाख तत्काल प्रदान गर्नुपर्ने, दोषीलाई कडाभन्दा कडा सजायको सुनिश्चितता गर्नुपर्ने माग अघि सारेका छन् ।

यसका साथै, स्वास्थ्य राज्यमन्त्री डा. सुरेन्द्र यादव र प्रदेश सभा सदस्य कौशल कुमार यादवको लगानीमा सँचालित जानकी हेल्थ केयरले पिडितबाट असुलेको १०/१५००० रुपैयाँ आफ्नो समाजिक उत्तरदायित्व बहन गर्दै तत्काल फिर्ता गर्न माग गरेका हुन् ।

गत शनिबार दिपावलीकै दिन २२ बर्षिय आरतीमाथि उनकै श्रीमान सँजीव साहले एसिड प्रहार गर्दा शरिरको २० प्रतिशत भाग जलेको हो । उनको उपचार अहिले अस्पतालमा भईरहेको छ ।

गत बर्ष वीरगँजकी मुस्कान खातुनलाई एसिड प्रहार गरिएको थियो । उनलाई प्रदेश नम्बर २ का मुख्यमन्त्री मो. लालबाबू राउतले ५ लाख रुपैयाँ सहयोग गर्दै जति खर्च लागे दिने निर्णय गरेका थिए । मुस्कान अहिले सकुशल छिन् ।