मधेशी भएकै कारण प्रहरीले गोली हानेको भन्दै जसपाको प्रदर्शन

न्यूज ब्यूरो, जनकपुरधाम । प्रदेश नम्बर २ को बारामा प्रहरीले मधेशी भएकै कारण समान्य अवस्थामा पनि गोली चलाएको भन्दै प्रधामन्त्री र गृहमन्त्रीको विरोधमा प्रदर्शन गरिएको छ ।

गत बुधबार राती बारामा स्थानीयवासी र प्रहरीबीच भएको समान्य झडप गोली चलाउँदा स्थानीय एक बालकलाई लागेपछि जनता समाजवादी पार्टी (जसपा) समर्थित युवाहरुले जनकपुरमा शनिबार साँझ प्रदर्शन गरेका छन् ।

प्रहरीले चलाएको गोली लागेर बाराको सुवर्ण गाउँपालिका वडा नं. २ कवही गोठ बजार बस्ने बर्ष १४ का रन्जन यादव घाईते भएपछि युवाहरुले मधेशी भएकै कारण समान्य अवस्थामा पनि गोली हानेको आरोप लगाउँदै प्रधानमन्त्री केपी शर्मा ओली र गृहमन्त्री राम बहादुर थाप बादल विरुद्ध प्रदर्शन गरेका छन् ।

बुधबार राति साढे ८ बजेतिर किसानले भारतबाट आलु,प्याज तथा बीउ ल्याइरहँदा प्रहरीले तस्कर समुह भन्दै नियन्त्रणमा लिएर सदरमुकाम कलैया पठाउन खोज्दा उक्त समानहरु ल्याएका समूह र स्थानीयहरु मिलेर अवरोध गर्न खोजेको र प्रहरीको गाडी तोडफोड गरेपछि झडप भएको थियो।

शनिबार साँझ जनकपुरको जनकचोकमा जसपाका नेता कार्यकर्ताहरुले ‘रञ्जन यादवलाई न्याय देऊ’, ‘गोली चलाउने प्रहरीलाई कारबाही गर्’जस्ता नारा लगाउँदै प्रदर्शन गरेका हुन् ।

तस्करहरुसँग लाईन मिलाएर सेटिँग गरी समान पार गर्ने सोही प्रहरीहरुले समान्य नागरिक कम दर भाउमा घर प्रयोजनको लागि समान ल्याउँदा गोली चलाएर आफू बहादुर बन्ने खोजेको आरोप लगाएका छन् ।

उनीहरुले रन्जन यादवको उपचारको व्यवस्था मिलाउनुपर्ने तथा घटनामा सँलग्न र गोली चलाउने अर्डर दिने प्रहरीलाई कारवाहीको दायरामा नल्याएसम्म आन्दोलन प्रदर्शन जारी राख्ने चेतावनी समेत दिएका छन् ।

बाराका प्रमुख जिल्ला अधिकारीले ४ सदस्यीय छानबिन समिति समेत गठन गरी घटनाको छानबिन गरिरहेको छ । रन्जनको टाउकोमा गोलि लागेर स्थानीय एसआर अस्पतालमा उपचार भईरहेकोमा स्थानीय अस्पतालमा उपचार हुन नसक्दा थप उपचारको लागि वीरगन्जको बयोधा अस्पतालमा रिफर गरिएको अस्पतालका चिकित्सक जितेन्द्र यादवले जानकारी दिएका छन् ।