बीरगँजमा रोकियो कोरोना परीक्षण

न्यूज ब्यूरो, वीरगँज । देशको आर्थिक नगरी भनेर चिनिने प्रदेश नं. २ को वीरगँजमा कोरोना परीक्षण रोकिएको छ । पछिल्लो दुई दिनदेखि स्वाब सँकलनको अभावमा कोरोना परीक्षण रोकिएको हो ।

प्रदेश नं. २ को विभिन्न जिल्लाहरुबाट आउने गरेको स्वाब परीक्षण विगत दुई दिनदेखि परीक्षणको लागि थ्रोट स्वाबको स्याम्पल (नमुना) नआउँदा पिसिआर परिक्षण रोकिएको वीरगँज स्थित नारायणी अस्पतालका प्रवक्ता डाक्टर अतुलेश कुमार चौरसीयाले बताए ।

प्रदेश २ को पर्सा जिल्ला सहित सर्लाहीसम्मको स्वाब सँकलन भई अस्पतालमा आउने गरेकोमा विगत दुई दिनदेखि पर्याप्त सँख्यामा नआउँदामा पिसिआर चेकअप रोकिएको उनले बताए ।

उनले पिसिआर मेसिन सञ्चालनका लागि कम्तिमा पनि ९६ वटा स्वाब आवश्यक रहेको जानकारी दिए । ९६ भन्दा कम सेम्पललाई लिएर पिसिआर मेसिन सञ्चालन गर्दा धेरै रिएजेन्ट बर्बाद हुने उनले बताए ।

पछिल्लो दुई दिनमा ११ र १५ वटा गरी २६ वटा थ्रोट स्वाबको सेम्पल जम्म भएको उनले जानकारी दिए ।