केन्द्र सरकार हारेपनि मधेश सरकारले कोरोना टेष्ट 'फ्रि' गर्ने

न्यूज ब्यूरो, जनकपुरधाम । नेपाल सरकारको केन्द्र सरकारले कोरोना भारसको परीक्षण र उपचारको लागि पछि हटेपनि प्रदेश नं. २ सरकारले प्रदेशवासीको कोरोना परीक्षण र उपचार निःशुल्क गर्ने जनाएको छ ।

बुधबार प्रदेश नं. २ का मुख्यमन्त्री मो. लालबाबू राउतले प्रदेशवासीको लागि कोरोना परीक्षणको लागि लाग्ने सम्पूर्ण सहयोग प्रदेश सरकारले गर्ने बताए । उनले कोरोना उपचारको लागि केन्द्र सरकारले आफ्नो जिम्मेवारीबाट पछि हटेपनि प्रदेश सरकार परीक्षणको लागि कुनै शुल्क नलिने बताए ।

प्रदेश २ मा संघीय सरकारले कोरोना भाइरस संक्रमितको उपचारका लागि विशेष सहयोग उपलब्ध नगराएको आरोप लगाउँदै अगामी दिनमापनि सक्दो सम्पूर्ण सहयोग गर्ने उनले बताए ।

प्रदेश सरकारले सबै जिल्लामा कोरोना भाइरस संक्रमितको उपचारको प्रबन्ध मिलाएको जनाउँदै मुख्यमन्त्री राउतले संघीय सरकारले खर्च नदिएपनि प्रदेश सरकारले सहयोगलाई निरन्तरता दिने बताए ।

केन्द्र सरकारको स्वास्थ्य तथा जनसँख्या मन्त्रालयले दैनिक मिडिया ब्रिफिँगको क्रममा अब सरकारले कोरोना परीक्षणको लागि सहयोग नगर्ने तथा नागरिकले स्वयम सबै खर्च बेहोर्नुपर्ने सूचना सार्वजनिक गरेपछि चौतर्फी आलोचलना भइरहँदा प्रदेश ३ अर्थात बागमति सरकार र प्रदेश २ सरकारले नागरिकको कोरोना परीक्षण निःशुल्क गर्ने भएको छ ।

यद्यपी, प्रदेश नं. २ मा पनि कोरोना परीक्षण अपेक्षाकृत रुपमा नागरिकले भने महसुस गर्न सकेका छैनन भने सरकार अथक प्रयासमा लागेका छन् ।