जनकपुरः प्रशासनलाई चुनौति दिँदै फुटपाथमा पसल, ट्राफिक प्रहरी पनि तँग

न्यूज ब्यूरो, जनकपुरधाम । स्थानीय प्रशासनले जनकपुरको फुटपाथम कुनै प्रकारको पसल नथाप्न नियम लागू गरेपनि जनकपुरको विभिन्न स्थानमा फुटपाथ ठेला, पसल थापेपछि दुर्घटनाको पनि जोखिम बढदै गएको छ ।

सोही क्रममा जनकपुरधाम उपमहानगरपालिका वडा नं. २ कदमचोकमा हुलाकी मार्ग जाने बाटोमा पनि दुवै तर्फबाट सडकमै ठेला, रिक्सा, अटो लगाएपछि दुर्घटनाको जोखिम बढदै गएको छ भने सोही सँगै सधैं ट्राफिक जाम समेत हुने गरेको छ ।

केही महिना अघि मात्र कदमचोकदेखि कपिलेश्वर जाने बाटो हुलाकी सडकलाई विस्तार गरिएपनि अहिले सडकमै सार्वजनिक बस, अटो रिक्सा सहित ठेला, फुटपाथ पसल सँचालन गरेपछि आम सर्वसाधारणलाई आवतजावत गर्न कठिनाई भएको छ ।

स्थानीय पसले एवम् स्थानीयवासीहरुले समेत बीच रोडमै ठेला पसल, फुटपाथ पसल सँचालन गरेपछि आफूहरुलाई कठिनाई भएको गुनासो गरेका छन् । यस सन्दर्भमा ट्राफिक प्रहरी कार्यालय धनुषाले तत्कालै टोली पठाएर फुटपाथ खाली गराउन लगाएको जानकारी दिए ।

यद्यपी, जनकपुरधाम उपमहानगरपालिकाले समन्वय नगर्दा ट्राफिक प्रहरीलाई समेत फुटपाथ पसलेहरु, रिक्साबालाहरु नटेरेको गुनासो ट्राफिक प्रहरीको छ । सो सन्दर्भमा मेयर लालकिशोर साहसँग सम्पर्क गर्न खोज्दा ९८५०२१७२० नम्बर अफ गरिएको थियो ।