सिरहा : विद्यार्थीलाई विद्यालय नबोलाउ, वैकल्पिक प्रक्रिया अपनाउ

न्यूज ब्यूरो, सिरहा । सिरहाको जिल्ला विपद व्यवस्थापन समितिले तत्काल विद्यालय सञ्चालन गरेर पठनपाठन नगर्न निर्णय गरेको छ ।

जिल्लाका विभिन्न स्थानीय तहले सुरक्षा मापदण्ड अनुसार विद्यालय सुचारु गर्ने निर्णय गर्दै पठनपाठन खुल्ला गरेको केहि दिन नबित्दै समितिले सोमबार यस्तो निर्णय गरेको हो ।

कोभिड–१९ महामारीको जोखिम जिल्लामा अझै उच्च रहेको भन्दै मंगलबारबाट लागुहुने गरी वैकल्पिक शिक्षा प्रणाली अपनाउन जारी सूचनामा भनिएको छ ।

जिल्लाका सहरी क्षेत्रका विद्यालयहरुले विद्यालयमै विद्यार्थी बोलाएर र नीजि विद्यालयहरुले बसमा विद्यार्थी ओसारेर पढाउन थालेपछि समितिको बैठकले मंगलबारदेखि लागु हुनेगरी विद्यार्थीलाई भौतिक रुपमा विद्यालयमा उपस्थित नगराई वैकल्पिक शिक्षण प्रक्रिया अपनाउन सुचित गरेको हो ।

सिरहाका प्रमुख जिल्ला अधिकारी प्रदीपराज कणेलको अध्यक्षतामा बसेको बैठकले सरकारद्वारा जारी ‘विद्यार्थी सिकाई सहजिकरण निर्देशिका २०७७’ अनुसार पठनपाठन गर्न गराउन भनिएको भएपनि निर्देशिका विपरित कतिपय स्थानीय तहका विद्यालयमा साविकमा झैँ विद्यालय सञ्चालन गरी पठनपाठन गराएको, बसबाट विद्यार्थी ओसार्ने गरेको देखिएको भन्दै यसरी पठनपाठन नगर्न निर्देश गरेको छ ।

स्थानीय तहहरुले तत्काल आफ्ना क्षेत्रका विद्यालयलाई यसै सूचनालाई आधार मानेर भौतिक उपस्थितिमा पठनपाठन रोक्न सूचनामा उल्लेख गरिएको छ ।

विद्यालयहरु सञ्चालन भएपछि कोभिड जोखिमलाई नजरअन्दाज गर्दै निजी विद्यालयले आर्थिक लाभको पाटोलाई मात्र हेरेको एकाथरी आरोप लाग्दै आएको छ ।